Astelehen honetatik aurrera, Laudioko Udalak, Laudio Haziren bitartez, lana bilatzeko zerbitzu berria jarriko du martxan, udalerriko langabeei laguntzeko. Astero, Udalaren webgunean lan-eskaintza publiko eta pribatuen zerrenda argitaratuko da. Bertan datu hauek bilduko dira: enplegu-atarietan (hasieran Infojobs, Infoempleo eta Indeed), aldi baterako lan-enpresa edo ABLEetan (Grupoempleo, Randstad, Adecco, Iman Temporing, Eulen eta Alliance), Lanbiden, eta beste enpresa pribatu eta zentro batzuetan agertzen diren eskaintzak. Autonomia erkidegoko egunkarietan jasotzen diren lan-eskaintzak ere argitaratuko dira. Eskaintzarekin batera, eskainitako enplegua lortzeko baldintzak eta izena emateko prozedura aurreratuko dira.
Zerbitzuak ez ditu Laudiorako lan-eskaintzak bakarrik barne hartuko, hurbileko beste udalerri batzuk ere izango ditu kontuan, hala nola Aiaraldeko herri guztiak (Amurrio, Okondo, Artziniega, Aiara, Orozko, Urduña), Laudio-Bilbo ardatza (Arrankudiaga-Zollo, Ugao-Miraballes, Arrigorriaga eta Basauri barne), eta Bilbo Handia. Eskaintzak astero eguneratuko dira, eta izena emateko aktibo daudenak baino ez dira jasoko.
Ekimena beste pauso bat da Laudio Haziren estrategian eta Laudion enplegua eta laudioarren enplegagarritasuna hobetzeko eskainitako zerbitzuetan, eta beste programa batzuekin bat egiten du, orientazio-zerbitzuarekin, enplegu-planekin edo Udalak antolatzen dituen prestakuntza-ikastaroekin, besteak beste.