Uda honetan Laudioko Udalak Herri Udalekuak programa jarriko du martxan berriro. Edizio berri honetarako, Gazte Zerbitzuak, 2006 eta 2011 urteen artean jaiotako gazteei beraien nortasuna garatzen lagunduko dien gizarte eta hezkuntza gunea diseinatu du. Izan ere, ez da jolasteko eta aisialdirako espazioa bakarrik izango, beste eragile batzuek ere hartuko dute parte gazteen garapenean.
“Programatutako ekintzak eta jarduerak adin tarte horri dagokion bilakaera-uneari egokitzen zaizkio”, adierazi du Julian Larisgoitia Gazteriako zinegotziak. Izan ere, 11 eta 12 urtetik beherakoentzat astean bi topaketa antolatu dira Bizilabe proiektuaren barruan. “Tailer horien bitartez, adingabeak teoriak eta esperimentuak beren kabuz egitera bultzatu nahi dira, eta oso gaztetatik zientziarekiko eta teknologiarekiko gogoa piztu nahi da”, zehaztu du sail horretako zinegotziak.
2012 eta 2018 artean jaiotako udalerriko haurrak ere ez dira udako aisialdiko jarduera klasiko horiek gabe geratuko. Izan ere, Kultura Zerbitzuak dena prestatu du adingabe horiek udako oporretan udalerriaz goza dezaten. “Ekimen honen bitartez, inguruneko baliabide fisikoak eta sozialak ezagutu eta aprobetxatu nahi dira, egungo eta etorkizuneko ondare gisa, eta, aldi berean, balioetan oinarritutako hezkuntzaren transmisioa eta aisialdian euskararen erabilera bultzatu nahi dira”, azpimarratu du Maite Cortazar Kultura zinegotziak.
Izen-emateak eta data
Gazteentzako programa astelehenetik ostiralera egingo da, 09:00etatik 14:00etara, eta lau astez luzatuko da, uztailaren 4tik 29ra. Jarduerak Gaztelekuan egingo dira.
Txikienentzako Egutegia desberdina izango da. Herri Udalekuak bost astez egingo dira, ekainaren 27tik uztailaren 29ra, hain zuzen ere. Dinamikak herriko zein kanpoko leku interesgarrietan egingo dira. Hala ere, Zubiko Kurajon sukaldaritza-tailer bat egitea ere aurreikusita dago. Adingabeak biltzeko lekua Liburutegi Zaharra izango da. Jarduerak astelehenetik ostiralera egingo dira, 09:30etik 13:30era.
Parte hartu nahi dutenek udaletxeko HAZn eman ahal izango dute izena 08:00etatik 14:30era. Edo modu telematikoan, udalaren webgunearen bitartez. Aurreko urteetan bezala, asteko izen-emateak egingo dira, eta aste bakoitzak 15 euroko kostua izango du. Gainera, pertsona bakoitzak aste batean edo gehiagotan eman ahal izango du izena. Eskainitako plaza kopurua gaindituz gero (gazte-programan 40 plaza eskaintzen dira eta haurrenean 168), zozketa egingo da. Epea asteazken honetan, maiatzaren 25ean, hasi eta ekainaren 8an amaituko da. Laudioko Udalak hilaren 14an argitaratuko du bi programetako parte-hartzaileen behin betiko zerrenda.