Datozen asteetan Laudioko Udalak udalerriko hainbat gune asfaltatzeko kontratua lizitatuko du. Zehazki, hauetan jardungo da: Leziagabiden, 9. zenbakitik Sagasti auzoa gurutzatzen duen zubiraino; Sagastin, aipatutako zubitik Isasi kalearekin dagoen bidegurutzeraino –konpondu berri den tarte bat izan ezik–; Zumalakarregi 14-16an (Ardantzazar), Aiarako Lurraldea kalearen izkinatik Jose Arrue Margolariaren kalearekin bat egiten duen punturaino; eta Goikoetxe 1, 3, eta 5ean, Goikoplaza kaletik, 22. eta 24. zenbakien aurreko bidea eta Goikoetxe kalearen bide nagusia hartuz, 10. Zenbakiraino, eta 3 eta 5 zenbakien etxe-sailari ematen dion buelta.
Leku horietan ez ezik, udal-administrazioak asfaltatze-lanak egingo ditu Santa Cruz baselizako zoruan, 1. eta 3. zenbakien aurrean, eta bertara igotzeko bidean bertan, Santa Ana bidean, Iturralde kaleko 4. zenbakiko sarreratik Aretako frontoiko aparkalekuraino; eta Errotarin, Goikoetxeko zubitik Errotari pasealekuko 3. etxesaileraino. Oketa kaleko 8. zenbakitik Latiorrondo kaleraino doan tartean ere esku hartuko da. Eta Motxotekalen, aparkalekuaren goiko aldetik 17. zenbakiraino.
Deskribatutako jarduketa guztiak egiteko, 10.000 m² inguru asfaltatuko dira guztira, eta Udalak 280.584,45 euro inbertituko ditu, BEZ barne.