Laudioko Udalak aurrera jarraitzen du Hiri Agenda gauzatzeko prozesuan. Dokumentu horrek, 2030. urtera begira, udalerriarentzako proiektu eta ekimen garrantzitsuenak zehaztuko ditu.
Prozesu horretan, Laudioko bizilagunek funtsezko zeregina dute, eta dokumentuan, hain zuzen ere, haien beharrak jaso nahi dira, etorkizuneko lehentasunak eta Laudio eraikitzeko proiektu estrategikoak identifikatuz.
Laneko lehenengo tailer bat egin ondoren –hilaren 16an egin zen–, gaurtik aurrera herritarrentzako inkesta jarriko da abian, edozein bizilagunek orain arte egindako lanari buruz bere iritzia eta kezkak eman diezazkion Udalari. Inkesta online eta udaletxeko sarreran dagoen hautestontzian aurrez aurre egin ahal izango da, eta datorren igandera arte (uztailak 10) erantzun ahal izango da.
Galdetegiak hiru helburu ditu:
• Laudioko diagnostikoaren ondorio nagusiak herritarrekin batera balioztatzea: hobetzeko arloak eta indarguneak, bai eta etorkizunerako aukerak eta mehatxuak ere.
• Laudioko 2030eko ikuspegia modu adostuan eraikitzea; hau da, herritarrek nola irudikatzen duten etorkizuneko Laudio.
• Hurrengo hamarkadarako lehentasunezko ildoak eta funtsezko proiektuak identifikatzea.
Inkesta horrez gain, ekainaren 30ean, osteguna, informazio panel bat jarriko da Herriko Plazaren inguruan, herritarrek Hiri Agendari ekarpenak egiteko aukera izan dezaten. Udalak prozesu garrantzitsu horretan parte hartzera animatu nahi ditu laudioar guztiak.
“Dokumentu hau oso aukera ona da Laudiorentzat, hiri-jasangarritasuneko eredurantz aurrera egingo duten jarduketa berriak modu adostuan ebaluatzeko eta proiektatzeko aukera emango digulako. Hiri Agendak udalerri eta gizarte gisa izan nahi duguna definituko du”, adierazi du Ander Larrinaga Hiri Garapeneko Zinegotziak.