Laudioko Udalak herritarren partaidetzarako atari berri bat estreinatu du. Plataforma (https://laudio.governalia.es/) berri horren helburua Udalak abian jartzen dituen ekimen eta parte-hartze prozesu guztietan herritarrek modu erraz eta intuitiboan parte hartu ahal izatea da. Adibidez, hemendik aurrera Laudioko bizilagunek aukera izango dute ordenantzak eta erregelamenduak jendaurrean jartzeko prozesuetan ekarpenak egiteko, herritarrei zuzendutako inkestetan eta kontsultetan parte hartzeko, aurrekontu parte-hartzaileen prozesuetan ekimenak proposatzeko edo udalerrirako estrategikoak diren proiektuei buruz duten iritzia emateko, Udal-administrazioak egiten dituen proposamenei buruzko bozketetan parte hartuz.
Ekimen horren bidez, udal-kudeaketari buruzko erabakiak hartzeko orduan herritarren lankidetza eta parte-hartzea areagotzeko konpromisoa indartu du gobernu-taldeak, eta horrek Udalaren eta laudioarren artean ikasketa partekatua lortzeko aukera ematen du.
Plataforma euskaraz eta gaztelaniaz dago erabilgarri, kode irekiko software librean garatu da, eta, gainera, gailu mugikorrekin guztiz bateragarria da. Proiektua Hiri Agendarekin zerikusia duten proiektuetara bideratutako Europako funtsekin finantzatu da. “Ataria udal gardentasuna eta herritarren parte-hartzea zabaltzeko eta indartzeko estrategia berriaren barruan dago, duela hilabete batzuk onartu genuen Araudiaren ildotik” nabarmendu du Ander Añibarro alkateak.
Orain arte, izapide horiek guztiak udalaren webgunetik egiten ziren. Bertatik, herritarren parte-hartzea errazagoa eta irekiagoa izango den atari berri honetara joan ahal izango da.
Hileta eta omenaldi zibilen ordenantza berrikusteko prozesua
Plataforma berria estreinatzeko, Udalak jendaurrean jarriko du Hileta eta Omenaldi Zibilen Ordenantzaren aldaketa; 2016an berrikusi zen azken aldiz, eta eguneratu egin behar da. Herritarrek estreinatu berri den partaidetza-atariaren bidez egin ahal izango dizkiote ekarpenak proposatu den testu berriari.