Laudioko eta inguruko udalerrietako emakumeek oso hitzordu berezia izango dute Lezeaga Aretoan, Kuluxka Antzerkiaren eskutik etorriko den “Izan gaitezen sorginagoak” ekimenarekin. LAIA Laudioko programazioaren barruan eta Laudioko Udaleko Emakume eta Berdintasun Zerbitzuak bultzatuta, Laudioko sorginen benetako historia eta egungo feminismoarekin duen harremana azalduko duen ikuskizuna prestatu eta gauzatuko da. Dinamika asteazkenetan izango da, 18:00etatik 20:00etara.
“Dinamikan parte hartzen duten emakumeek, ziur bizitza osoan gogoratuko duten xede garrantzitsu eta aberasgarria aurkituko dute. Dokumentazioa bilatzeaz gain, eszenografia eta jantziak sortuko dituzte, eta musikaz eta dantzaz arduratuko dira.
Lana 2023ko martxoaren 8an iritsiko da ikus-entzuleengana”, zehaztu du Loli Muriel Emakume eta Berdintasun Zerbitzuko zinegotziak. Performancearen eta antzerki-ekintzaren bitartez, ahalduntzerako espazioa sortu nahi da.
Parte hartzeko ez da beharrezkoa izango emakumeek aurretik arte eszenikoetan esperientziarik izatea, helburua talde-sorkuntzaren bitartez eguneroko arazoak ikusaraztea delako. Oraingoan, antzezlana sorginei eta feminismoari buruzkoa izango da. Parte hartu nahi dutenek 944 03 48 50 telefonozenbakiaren bitartez edo laialaudio@laudio.eus helbidera mezu elektroniko idatziz eman beharko dute aurretik izena.