Laudioko Udalak, udalerrian bizikletaren erabilera sustatzeko eta txirrindularien zein oinezkoen segurtasuna bermatzeko xedez, trafikoarekin partekatutako sare batean ezarriko ditu bidegorriak udalerrian zehar, betiere segurtasun-baldintzetan eta bizikleta galtzadan erabat integratzeko moduan. Laudioko Hiri Mugikortasun Jasangarriko Planaren (HMJP) arabera, Laudiok Zumalakarregi kaleko bidegorria kenduko du.
“Laudioko egungo bizikleta sarea Zumalakarregiko ardatzean loturarik ez duten tarteetatik igarotzen da, oinezkoek presentzia handia duten lekuetatik. Horregatik, Zumalakarregiko bidegorri bereizia kendu egingo da, bestela Zumalakarregi, berez, ziklo-kale bihurtuko litzatekeelako, eta espaloian oinezkoekin egon daitezkeen gatazkak saihesteko”, Joseba Amondo Obra eta Zerbitzuetako zinegotziak zehaztu duenez.
Bizikletak Zumalakarregiko espaloitik ateratzeko, beharrezkoa da bidegorriak gaur egun hartzen duen espazioa berrantolatzea, batez ere 1 eta 27 zenbakien arteko tartean. Tarte horretan zoladura oso egoera txarrean dago eta desnibelak daude.
Gauzak horrela, bidegorria kentzeko eta haren azalera oinezkoentzako espaloiaren mesedetan txertatzeko, Laudioko Udalak bidegorriari dagokion zoladura eraistea eta azalera hori zolatzea proposatzen du, oinezkoentzako gunean duen akabera bertsua emanez.
Obrak egiteko, Udalak 92.044,25 euroko partida ekonomikoa erabiliko du. Eta gauzatzeko epea zortzi astekoa izango da. Lizitazioa urriaren 25era arte egongo da zabalik.