Gaur egun gutxi erabiltzen den eta sastrakaz beteta dagoen Pagolar mendiko larreari eusteko asmoz, Laudioko Udalak mendiaren perimetroa itxiko du. Lursailak ez du Kanadako pasabideen bidezko mugarik, ezta A-625 errepiderako itxiturarik
ere.
Esku-hartze horren bidez, Laudioko Udalak herriko animalientzako eta abeltzainentzako gune seguru bihurtuko du 15 hektareako larrea. Azken hamarkadan, batez ere Larrazabal, Lekanda eta Lekandazar auzoetako bizilagunek erabili dute mendi-eremu hori. Jarduketa horrekin, Laudioko abeltzaintza zaintzea eta tradizioari jarraipena ematea espero da.
28.536,16 euroko aurrekontua duen jarduketa bai abeltzainentzat bai larrearen mantentze-lanetarako positiboa baldin bada, Mostatxako hegalean bigarren eskuhartzea egitea aztertuko da. Horrela, udalerriko larre-eremuak 5 eta 6 hektarea artean handituko dira.
Suteen aurkako prebentzioa eta borroka
Horrez gain, soropilak garrantzi gutxiko suteak zabaltzea eragotziko du. Gailurrak garbi izatea Udalaren suteen aurkako prebentzio- eta borroka-estrategiaren parte da. Izan ere, gaur egun, Udala mazela horretan dagoen pagadia berreskuratzeko lanean ari da.
Gainera, hesiz itxi beharreko eremuak alertze-azalera txiki bat eta basa-pinuzko beste bat ditu. Bi espezieak bateragarriak dira baso eta larre sistema horiek garatzeko, eta, etorkizunean, eremu egokitua sortzeko aukera emango dute. Duela 15 urte landatutako haritz-unadak ere errespetatuko dira, babesleak mantentzen jarraitzen dutelako eta abereek ez kaltetzeko adinako garapena dutelako.