Laudioko Udalak akordioa lortu du Vitoria-Gasteiz eta Landeta kaleetako kirolzelaiaren ondoko lursailaren jabeekin, doako aparkaleku publiko gisa egokitzeko.
Horrela, auzoak 35 aparkaleku gehiago izango ditu. “Neurri horrekin, inguruko bizilagunen aparkaleku-beharrei erantzuten saiatzen gara, eta, gainera, autoa partekatzen duten eta bidesaria dagoen lekua elkargune gisa erabiltzen duten pertsonentzat disuasio-aparkaleku gisa erabiltzeko aukera emango dugu”, adierazi du Ander Larrinaga Hiri Garapeneko zinegotziak.
Laudioko Udala dagoeneko 1.841 metro karratuko azalera duen lursaila egokitzeko lanetan ari da. Oraingo honetan, lursail horretarako errentamenduaren edo alokairuaren formula aukeratu da, udalerriko beste espazio batzuetan erabiltzen den sistema bera. Errentamendu horrengatik Udalak 1.452 euro ordainduko ditu hilean.
“Landaluzeko kasuan bezala, alokairu-sistema aukeratu dugu, izan ere, zaila da aparkaleku gisa erabiltzeko moduan dauden udal-lursailak lortzea”, gaineratu du zinegotziak.
Ekimen hori, Udalak azken hilabeteetan herritarren lehentasunak ezagutzeko haiei entzuteko abian jarritako prozesu nagusietatik sortu da. Horietan ondorioztatu denez, esku hartuko den eremuan ez dago aparkaleku publiko nahikorik.