Laudioko adinekoen artean osasuna, ongizatea eta bizi-kalitatea sustatzeko, Udalak Bizi Jardueren Orientazio Zerbitzua (BJOZ-SOAV) jarri zuen martxan 2020an. Programa horren bitartez, herriko adinekoek bizimodu aktibo eta osasungarriak lantzen dituzte, eta euren jarduera funtzionalaren eta kognitiboaren gainbehera konpentsatzeko estrategiak eta funtzionamendu emozional, motibatzaile eta sozialaren optimizazioa entrenatzen dituzte.
Zerbitzu hori Laudioko Udaleko gobernu-taldeak adinekoentzako jarduerak dinamizatzeko egiten duen apustu nagusietakoa da, eta herrian hazten eta sendotzen jarraituko du, Laudioko anbulatorioko fisioterapeutek bertara bideratzen dituzten ekimenen bitartez, adibidez. Gizarte zerbitzuetatik, osasun zentrotik eta orain fisioterapeutetatik bideratzeaz gain, autoderibaziorako aukera ere badago.
“Zerbitzua duela bi urte sortu zen #MugiLaudio plataformaren barruan. Plataforma Mugiment ekimeneko, Eusko Jaurlaritzako, Laudioko anbulatorioko, Osakidetzako eta Udaleko profesionalek osatzen dute. Adineko pertsonen bizi-kalitatea hobetzeko lankidetzaren eta koordinazioaren adibide bikaina da”, adierazi du Ander Añibarro alkateak.
BJOZ-SOAV bakardadea pairatzen duten adinekoei dago zuzenduta, bai eta gaitasun funtzionalari eta emozionalari dagokienez beste alterazio batzuk dituztenei ere. Jarduera fisikoko, osasuneko eta esku-hartze psikosozialeko profesionalek osatutako diziplina anitzeko talde batek zuzentzen du. “Bere abiapuntua osasuna da, ikuspegi integraletik, alderdi fisikoari erreparatuz, baina norberaren ongizatearen dimentsio psikologiko eta sozialak alde batera utzi barik. Zerbitzuak ikuspegi indibiduala du, baina baita kolektiboa ere, taldeko jarduera fisikoak eginez”, azaldu du Loli Muriel Gizarte Ongizateko zinegotziak.
Fisioterapiako pazienteak anbulatoriotik BJOZ-SOAVera bideratzea ez da izango 2023an Laudioko adinekoen kolektiboaren arretan eta dinamizazioan egongo den berrikuntza bakarra. Adinekoen Sant Rokezar gune berritua estreinatzeaz gain, urtean zehar, kolektibo horri lehentasunez zuzendutako gizarte, kultura eta kirol ekimen berriak martxan jartzeko egingo da lan. Esaterako, adinekoen osasun integrala sustatzeko ibilaldiak eta jardunaldiak. Laudioko Udalak aurrerago emango du horren berri, martxan daudenean.