Laudioko Udala joan den udan lantzen eta bultzatzen hasi zen “Laudioko Begiratoki Turistiko Digitala” proiektua abian da dagoeneko. Ekimen horren helburua herriko ondare kultural eta natural aberatsari balioa ematea da, laudioarrek eta bisitariek ezagutu dezaten. Horrela, azpimarratzekoa da lanaren ildo nagusietako bat udalerriko baliabideak edozein bisitarirentzako egokitzea izan dela, irisgarri eta, beraz, edonorentzat gozagarri bihurtuz, haien egoera fisikoa edozein dela ere.
Horrela, gaurtik bertatik, edonor sartu ahal izango da webgune honetara eta, era birtualean, Laudioko hainbat puntutatik paseatu, bere ondarearen ikuspegi berriak ezagutu eta ondare elementuei (ermitak, plazak, mendiak, etab.) buruzko informazio interesgarria lortu.
360º Argazkiak
Udalak DIELMO 3D enpresarekin gauzatu duen proiektu berritzaile horri esker, edozein pertsonak Laudioko interesgune nagusietara era autonomoan sartzeko eta bertatik ibiltzeko aukera du, haietara fisikoki joan behar izan gabe.
Horretarako, bereizmen handiko 360º-ko argazkiak erabili dira. Gainera, herritarrek eta bisitariek Laudioko historia eta nortasuna gehiago ezagutu dezaten, proiektu bisual eta interaktibo hau osatzen duten elementu guztiei informazioa gehitu zaie, euskaraz eta gaztelaniaz.
“Teknologia berriak erabiliz, udalerriko ondare-eskaintza zabaldu eta irisgarri egingo dugu, tokiko ondarea eta udalerriko baliabideak digitalizatzeaz gain”, nabarmendu du Ander Larrinaga Hiri Garapeneko zinegotziak.
Laudioko Begiratoki Digitala
Oraingoz, baliabide hauek txertatu dira “Laudioko Begiratoki Turistiko Digitalean”:
• Laudio Basabideak-eko hainbat puntu natural (Goikogana, Kamaraka, Arraño, Alpitsu… gailurrak, baita ibilbideetako funtsezko puntuak ere, adibidez, Luja, San Bartolome, Nerbioiko Parke Lineala, etab.).
• Laudioko baselizak eta elizak (Lamuzako San Pedro, Ermualde, San Joan ermita, San Roke ermita, San Antonio ermita, etab.).
• Lamuzako parkea eta bertan dauden espazioak.
• Anuncibaiko zubia, Katuxa-Ibarra jauregia, Ugartetarren dorretxea eta Laudioko ondareko beste elementu batzuk.
“Etorkizunean, plataforman Laudioko espazio eta ondare-elementu berriak sartzea gustatuko litzaiguke, esperientzia fisiko hobea eskaintzeko”, gaineratu du zinegotziak.