Astelehenean, urtarrilak 16, lehen aldiz bildu zen eratu berri den Kultur Kontseilua, Laudion kultura garatzeko elkarteak eta pertsonak biltzen dituen lantaldea. Udala azken hilabeteetan ari zen kontsulta-, eztabaida- eta partaidetza-organo hori osatzeko lanean, udal jarduketarako edo kultur sektoreko eragileen arteko lankidetzarako proposamenak jaso, sustatu, aztertu eta gauzatzeko.
Ander Añibarro alkateak, Maite Cortazar Kultura, Kirol eta Jai Zerbitzuko zinegotzi ordezkariak eta Udalbatzan ordezkaritza duten talde politiko bakoitzeko kide batek osatzen dute Kultur Kontseilua. Horrez gain, Laudion kulturaren garapenerako lan egiten duten elkarteetako, hainbat diziplina artistikorekin zerikusia duten herritar-erakundeetako eta beste eragile batzuetako 16 ordezkari daude.
“Prozesu hori, guztion artean gure kulturarako proiektu eta erronka berriak eta ilusionagarriak definitzeko eta lantzeko interesak eragin du. Oso pozik gaude azkenean Kultur Kontseilua abian jarri delako. Oso gogor egingo dugu lan udalerriko kultur sektorea indartzeko eta datozen urteetako Laudioko kultur erronkak betetzeko”, zehaztu du Maite Cortazar Kultura zinegotziak.
Lehen bilera horren helburua Kontseiluaren lanerako oinarriak ezartzea zen, organo egonkor bihurtzeko. Horrela, Kontseilua hiru hilean behin biltzea erabaki zen, zehazki hiru hilean behingo lehen astelehenean. Saio horiek, gainera, herritarrei irekita daude, landutako gaiak bertatik bertara entzutera joan daitezen.
Saioak 2023ko udal kultur politika eta programazioaren lehen errepasoa egiteko ere balio izan zuen, kulturari dagokionez ekitaldi honetarako indarrean dagoen udal aurrekontua azaltzeaz gain.
Era berean, kideek adierazi zuten beharrezkoa dela Kontseiluari egonkortasuna ematea, parte hartzeko benetako organoa izan dadin. Horrela, urtean landu beharreko gaiak definitzeko premian sakontzen da, kideentzat garrantzitsuenak diren Kulturaren Plan Estrategikoko proiektu eta ekimenei lehentasuna emanez. Izan ere, ezohiko bilera egitea erabaki zen otsailaren 13an, 18:00etan, Kultura Etxeko Arraño aretoan. Bilera horren helburua Kontseiluan parte hartzen duten taldeek eta pertsonek urteko gainerako egunetan landu beharreko gairik garrantzitsuenak azaltzea izango da.