Kasinoa Lamuza Parkeko leku enblematikoetakoa da, laudioarrek asko baloratzen duten gunea. Izan ere, bere ezaugarriak eta berezitasunak direla eta, leku ezin hobea da hainbat jarduera soziokulturaletarako. Gaur egun, kultur ekipamenduak, artisten eta tokiko elkarte eta eragileen formatu txikiko hainbat ekitaldi hartzen ditu, eta, horrez gain, entsegu gune gisa eta Laudioko Udalak kontratatutako beste jarduera batzuk egiteko balio du.
Kultur ekitaldiez gain, Kasinoa enpresa, elkarte eta erakundeen bilerak, aurkezpenak edo lan saioak egiteko lekua ere bada.
Egokitzen jarraitzeko eta espazioari balioaniztasun handiagoa emateko, Laudioko Udalak inbertsio bikoitza egin du duela gutxi.
Alde batetik, Kasinoari ekipamendu eszenikoa eman zaio, eszenatokiko plataformak triangelu-formako truss- ekin egokituz, argiztapen-sistema hobetzeko eta elementu eszeniko berriak sartzeko, teloiak, besteak beste.
Bestalde, megafoniako eta argiztapen-zuzeneko azpiegitura instalatu da kultur eta gizarte jarduerak gauzatu ahal izateko, bozgorailuak, mikrofonoak, fokuak eta antzeko elementuak barne.
“Kutxa eszeniko hori instalatuta, Kasinoaren espazioa kalitatezko kultur ekipamendu gisa finkatu dugu herrian. Gobernu taldetik Laudioko kulturaren alde eta kulturarako lanean jarraituko dugu”, agindu du Maite Cortazar Kultura eta Jaietako zinegotziak.
Gogoratu behar da inbertsio hori aurreko ekitaldiko aurrekontu parte-hartzaileetan jasotako herritarren proposamenetako bat izan zela, eta Laudioko Udalak bere gain hartu zuela, azpiegituran eskaintzen diren ekitaldiekin bat datorren espazio egokiagoa eskaintzeko.
“Gainera, inbertsio horri esker, argi- eta soinu-ekipoen alokairu-gastuak saihestu ahal izango ditugu, orain inoiz baino aukera gehiago eskaintzen dituen espazioa gure kultur taldeen eskura jarriz”, adierazi du zinegotziak.