Kultura Kontseiluak, Laudion kulturaren sustapenarekin zerikusia duten elkarte eta eragileek parte hartzen duten kontsulta- eta eztabaida-organoak, Laudioko kultur topaketa antolatuko du datorren udazkenean. Ekimen horren bidez, herriko kultur eragileek herrian egiten diren diziplina artistikoak erakutsiko dizkiete herritarrei, urteko 365 egunetan egiten duten lana ezagutaraziz.
Ekitaldi horretarako aukeratutako data urriko lehen asteburua izango da, ostiral arratsaldetik igande eguerdira. Espazioak, ordutegiak, jarduerak eta kontuan hartu beharreko gainerako alderdi zehatzak, egin beharreko jardueraren eta ekitaldian parte hartzeko interesa duten eragile kopuruaren arabera joango dira aztertzen eta planifikatzen.
Parte hartu nahi duten eragileek mezu elektronikoa bidali beharko dute kultura@laudio.eus helbidera maiatzaren 15a baino lehen. Mezu horretan alderdi hauek adierazi beharko dira:
- Gaia: LAUDIOKO KULTUR TOPAKETA
- Taldearen/elkartearen/kultur eragilearen izena
- Zein diziplina artistikotan aritzen zareten
- Izena eta harremanetarako telefono-zenbakia
- Jarduera mota edo/eta ekitaldian parte hartu nahi duten modua (erakustaldi edo emanaldiren bat egitea, klase praktikoa, informazio-standa, etab…), ahalik eta zehatzenak izaten saiatuz.
Herriko kultur eragile guztiak animatu nahi ditugu herrian egiten diren diziplina artistikoak ezagutzera ematea bilatzen duen lehenengo ekitaldi horretan parte hartzera.