Datorren larunbatean, maiatzak 13, 19:00etan, Zinegoak Bilboko Gaylesbotrans Nazioarteko Zinema eta Arte Eszenikoen Jaialdiko film laburren saioa hartuko du La Milagrosa Ikastetxeak.
Zinegoak 2004tik Bilbon egiten den kultur ekitaldia da, eta nazioartean LGTBI+ jaialdien erreferente bihurtu da. Helburua zinemaren eta arte eszenikoen bitartez sexu-aniztasunari, identitateari eta generoari buruz sentsibilizatzea eta mundu osoan gertatzen ari diren giza eskubideen urraketak salatzea eta familia-eredu berriak ikusaraztea da.
Oraingo honetan, Laudioko saioa emakume sortzaileei eskainita egongo da eta euren esperientziak, borrokak eta ametsak islatzen dituzten film laburrak erakutsiko dira. Sarrera doakoa izango da leku guztiak bete arte.
LGTBIfobiaren aurkako Nazioarteko Eguna (maiatzak 17) eta LGTBI+ Harrotasunaren Nazioarteko Eguna (ekainak 28) ospatzeko, Laudion Esti Urresola laudioarraren “20.000 Especies de Abejas” filma ere proiektatuko da hilaren 20an, bi emanalditan. Eta 25ean mahai-ingurua egingo da “Transexualitatea ikusarazteko solasaldia/ ¿Conoces la realidad trans?” izenburupean. Hizlariak Bea Sever (ama eta Naizeneko sexologoa), eta Hugo Goikoetxea (Naizeneko kide den Laudioko mutil transexuala) izango dira eta Mikel Oribek (Bizigaiko sexologoa) dinamizatuko du. Topaketa Lezeaga Aretoan izango da 18:30ean.
Ekitaldiek ekainaren 23an jarraituko dute, 21:00etan, gazteentzako Kaleko Ostiralak aisialdi programaren barruan egongo den “El show de la Polaca”-rekin.