Duela urtebete Udaleko Hizkuntza Normalkuntzarako Azpiarloak martxan jarritako ekimena fruituak ematen hasi da eta, hortaz, Altzarrate Kirol Elkartea izan da herriko kirol elkarteetatik Euskara Plan bat landu duen lehena, kolektiboari, kirolariei eta familiei zuzendutakoa. Horregatik guztiagatik, Udalak Altzarrate KE klubak hartutako konpromisoa eta egindako lana aintzatetsi eta balioetsi nahi du.
Bestalde, Udalak hizkuntza-normalizazioan aurrera egiten jarraituko du, beste klub eta tokiko erakundeek gero eta neurri eraginkorragoak bultza ditzaten, euskararen presentzia eremu guztietan errealitate izan dadin. Izan ere, klub bakoitzak bere Euskara Plana lantzea eta kirola "euskararen aurrerabiderako eta normalizaziorako garapen integraleko tresna" bihurtzea da azken helburua, Nagore Gomara Hizkuntza Politiketako zinegotziak nabarmendu duenez. Neurri txikiak edo handiak izan daitezke, elkarte bakoitzaren nahien eta ahalmenaren arabera eta "Udaletik laguntza eskainiko diogu parte hartu eta Euskara Plan bat egin nahi duen edonori, beharrezko baliabide guztiak bere esku jarriz", gaineratu du.
Altzarrate KE-tik argi dute euskararen garrantzia, "gure kultura eta nortasunaren parte delako", diote. Udalaren ekimenak kirol modalitate bakoitzera egokitu nahi du eta futbolean, adibidez, "hizkuntza gaztelania da", adierazi dute klubeko bozeramaileek. Horregatik guztiagatik, kirol taldeak euskara bultzatzeko neurriak hartzeko konpromisoa hartu du, "zelaiaren barruan zein kanpoan". "Euskara gure izaeraren parte da, eta euskaldun gisa harro sentitu behar dugu, beraz, erabil dezagun euskara", esanez amaitu dute.