Laudioko udal kiroldegiko erabiltzaileek eskuragarri dituzte jada 2024ko tasa eguneratuak udalaren webgunean. Oraingo honetan, zerbitzuak berritasunak dakartza; adingabeen adin-tartea bateratu da, 5 urtetik beherako haurrak izan ezik, doan erabili ahal izango dituztelako instalazioak; eta tasen prezioak eguneratu dira, %2,75eko igoerarekin. Zentzu horretan, gogoratu behar da erroldatu gabeko pertsonei %25eko errekargua kobratuko zaiela. Gaur egun, instalazioak 3.500 abonatu baino gehiago ditu.
Aurreko urteetan bezala, urteko kuota ordaintzeak eskubidea ematen du dohainik sartzeko Lamuza-Granja Polikiroldegiko igerileku klimatizatuan zein Ellakuriko igerileku aterpegabekoetan, eta alokairurik ez duten zerbitzu guztietan ere, gimnasioan, esaterako.
Hobariak
Ezarritako tasei honako hobari eta salbuespenak aplikatuko zaizkie:
- Laudion erroldatuta dauden familiek, eta gutxienez 4 kide abonatuta badituzte, %5eko deskontua izango dute. Hobaria %5 igoko da familia-unitateko kide berri bakoitzeko. Hobaria inskripzio-data edozein dela ere aplikatuko da.
- Guraso bakarreko familiek, bi kiderekin, %5eko deskontua izango dute. Hobaria %5 igoko da familia-unitateko kide berri bakoitzeko.
- Laudion erroldatuta dauden 60 urtetik gorakoek %90eko murrizketa izango dute banakako kuota eta alokairu guztietan, betiere familia-unitatearen diru-sarrerek lanbide arteko gutxienezko soldata gainditzen ez badute.
- Murrizketa hori bera aplikatuko zaie DBE eta Larrialdietarako Giza Laguntzak (LGL) jasotzen dituzten eta erroldatuta dauden pertsonei.