Hilaren 28an, 18:00etan Kasinoan, Laudioko Udalak lehen Toki Batzarra burutuko du; hau da, udalerri osoari eragiten dioten gaiei buruz auzokideen, elkarteen eta talde egonkorren eztabaidarako eta lankidetzarako foroa. Auzo Batzarretan ez bezala, Toki Batzarrean herriko gai globalak jorratuko dira. Izan ere, udalerrian martxan dauden proiektuei buruzko informazioa emango da, Abastos Plazako, Antzokiko eta Anbulatorioko proiektuetaz hitz egingo da, HAPOaz gain. Era berean, herritarrek parte hartzeko dituzten kanalak azalduko dira, baita foro horrek 2024ko udal aurrekontuen parte-hartze prozesuan duen inplikazioa ere.
"Lehen bilera informatibo honetan, Toki Batzarraren helburuak azalduko dira eta Tokiko Kontseiluaren sorrerari eta udal mailan dauden gai garrantzitsuei buruzko informazioa emango da. Horrekin helburu bikoitza lortu nahi dugu: urtean zehar gai hauek landuko dituen boluntario talde egonkor bat sortzea eta tokiko kontseiluan parte hartuko duen ordezkari bat izendatzea", azaldu du Parte Hartzeko zinegotziak, Nagore Gomarak.
Udalaren hurrengo urratsa Tokiko Kontseilua eratzea izango da, eztabaidarako eta parte hartzeko organo gorena. Izan ere, informazio-, eztabaida- eta aholkularitza-funtzioak izango ditu eta Laudioko garapen estrategikoan eragina izango duten udal-politikaren ildo nagusiak zehaztuko ditu. "Espazio honetan, udalerrian dauden kontseilu-sektorialak eta herri mailan pardaidetza sustatzen duten erakundeak koordinatuko dira, herritarrez gain. Helburua komuna da: inplikatzea eta elkarrekin lan egitea laudioarren bizi-kalitatea hobetzeko", ondorioztatu du zinegotziak.