Laudioko Udalak 2023ko ekitaldiaren likidazioa onartu zuen azken osoko bilkuran, aurrekontu arrunta 4,2 milioi eurotan handituz. Hori horrela, aurrekontu kolaboratiboen dinamikaren bigarren fase bat ireki da; herritarrek Laudiorako lehentasunezkoak diren inbertsio material eta sozialei buruzko hausnarketa komunitarioa egin dezaten. "2024 trantsizioko aurrekontua da, eta aurrekontu kolaboratiboen dinamika sartu dugu, herritarren ikuspegia sartzeko ere udalaren aurrekontuan", azpimarratu du Iñigo Martínez Ogasun zinegotziak.
Aurrekontuen eztabaida ekaineko osoko bilkuran amaituko da. Aurrretik, herritarren parte hartzerako organoek, sektorialek zein udalerri mailakoek (Kontseilu sektorialak, Toki Batzar eta Kontseilua), aztergai izango dituzte Auzo Batzar eta Kontseiluetan bildutako proiektu eta proposamenak, norbanakoek postontzietan luzatutakoekin zein talde politikoek aurkeztutakoekin batera.
"Herritarrek parte hartzeko politikak bultzatu nahi dituzten aurrekontuak dira, aurrekontu-programa berriak garatuz eta zerbitzuak eta politika publikoak mantenduz", nabarmendu du zinegotziak.
Horretarako, gobernu-taldeak lan-proposamen bat egin eta aurkeztuko du Tokiko Batzarrean, ekainaren 3an. Proposamen hori bera Tokiko Kontseilura eramango da ekainaren 6an eta 13an, aurrekontuaren zirriborroari buruzko irizpena aztertu eta adostasunez egiteko, betiere posible baldin bada. Aho bateko adostasunik lortzen ez bada, Toki Kontseiluaren irizpena ekaineko osoko bilkurara eramango da; eta 2023ko likidazioa 2024ko aurrekontuan nola txertatu zehazteko balioko du.
"Trantsizio-urtea da, eta esperientzia pilotu bat ere. Tokiko Kontseiluak prozesu horren guztiaren garapena baloratuko du, aurrekontuen lehentasunak zehazteko orduan herritarren parte-hartzean sakonduko duten formulak aztertzeaz gain", amaitu du zinegotziak.