Datozen hilabeteetan, eta ikastetxe publikoen hobekuntza planaren baitan, Laudioko Udalak 669.723,99 euro inbertituko ditu Lamuza, Latiorro eta Aretako ikastetxeetako leihoak berritzen; eta eskolen patioetan hobekuntzak egiten ere, irizpide inklusiboak jarraituz.
Ikastetxeetako leihoak berritzeko planaren fase berri honek aurrekontuaren zatirik handiena hartuko du, 569.723,99 euro, eta zentro guztien eraginkortasun energetikoa, baldintza akustikoak eta ikasleen erosotasuna hobetzeko balio izango du. Aipatutako ikastetxeetako leihoetan egingo diren lanek Eusko Jaurlaritzaren 341.834,39 euroko dirulaguntza izango dute, hau da, zenbateko osoaren %60a.
Patio inklusiboei dagokienez, Udalak 100.000 euro bideratuko ditu ikastetxeetako aisialdirako guneetan balio inklusiboak sustatzea helburu duten proiektuak garatzera. "Proiektu horien bidez jolaserako espazioak eta uneak sortu nahi ditugu, haurrek beren intereseko jolas-jarduerak ikuspegi inklusibo eta hezkidetzaile batetik egin ditzaten, berdintasunezko harremanak sustatuz", nabarmendu du Aitor Fernandez de Pinedo Hezkuntza zinegotziak.