Lamuza-Granja Udal Kiroldegiak astelehenetik aurrera emango die zerbitzua erabiltzaileei, ikasturte berri honetarako programatutako ikastaroekin. Oraingo honetan, kirol eskaintzak mantentze soinketa, pilates mat-fitness, aerostep, zumba, GAP, yoga, martxa nordikoa, tai-chi, combat gym eta uretako fitness biltzen ditu. Kirolen batean izena eman nahi dutenek irailaren 2tik 15era bitartean izango dute epea zabalik. Izen-emateak kiroldegian bertan edo Udalaren egoitza elektronikoan egin ahal izango dira.
Ekintzek hiruhileko kuota izango dute eta ikastaroen ordu kopuruaren araberakoa izango da; hau da, laudioarrentzat 2 orduko ikastaroek 17,85 euro balio izango dute eta 3 ordukoek 26,75 euro. Udalerrian erroldatuta ez dauden pertsonentzat, bi orduko ikastaroek 22,30 euroko kostua izango dute, eta 3 ordukoek 33,45 eurokoa. Plazak irailaren 18an zozkatuko dira eta azken emaitza 23an jakinaraziko da.
Kiroldegiak astelehenean ateak irekiko baditu ere, igerileku estalia ez da erabiltzaileen eskura egongo irailaren 9ra arte. Aurreko urteetan bezala, urteko kuota ordaintzeak eskubidea ematen du dohainik sartzeko Lamuza-Granja polikiroldegiko igerileku klimatizatuan zein Ellakuriko igerileku aterpegabekoetan, eta alokairurik ez duten zerbitzu guztietan ere, gimnasioan, esaterako.