Ekainaren 1ean Udalak abiadura radar ibiltaria aktibatu zuen, Karmen eta Goienuri kaleetan, eta Areta eta Gardea herriguneen artean, herriko trafikoa baretzeko neurri gisa. Hala ere, martxan jarri zenetik, sistemak 485 arau-hauste zenbatu ditu guztira, eta %10ak 100 kmn. orduko abiadura gainditzen zuen.
"Sentsibilizazio-kanpaina honekin gidariak kontzientziatu nahi ditugu hiri-eremu osoan eta landa-inguruneetan ezarritako gehieneko abiadura errespetatzearen garrantziaz. Kopuru horiek kezkatzen gaituzte. Orain gure herrian ibilgailuek duten abiaduraren benetako erradiografia dugu", azpimarratu du Ainize Gastaka alkateak.
Neurri horretaz gain, Nerbioi kaleko zebra-bidean, 32 eta 34 zenbakien artean, argiztapen adimenduneko sistema bat jarri du Udalak inguruan jendea dagoela antzemateko; eta datozen egunetan abiadura-muga errespetatu den ala ez kontuan hartuta aurpegi zoriontsu edo triste bat erakutsiko duten emotikono irudidun radar bi jarriko ditu Zumalakarregin eta Goikoplazan.
Erdigunean garatutako neurri hauekin batera, abiadura muga adierazten duten seinaleak jarri dira landa eremuetarako sarbideetan, ibilgailu, oinezko eta txangozale eta auzokideen arteko elkarbizitza sustatzeko.
Era berean, eta irailaren 22an ospatzen den Autorik Gabeko Munduko Eguna aprobetxatuz, Udalak ikastetxeen inguruko trafikoari buruzko sentsibilizazio-kanpainari ekin zion, eta ikasleak, irakasleak eta familiak kotxea alde batera uztera gonbidatu zituen irailaren 23an (astelehena), udaltzainek ikastetxeetan eskaintzen ari diren bide-heziketako saioekin bat eginez.