Laudioarren artean zahartze aktiboa sustatze aldera eta herritarrekin Laudio "atseginago eta lagunkoiago" bat eraikitzeko helburuarekin, joan den uztailean Laudioko Udalak bat egin zuen Eusko Jaurlaritzako Berdintasun, Justizia eta Gizarte Politiketako Sailak bultzatutako "Euskadi lagunkoia" programarekin, adinekoen, elkarteen eta, oro har, herritarren parte-hartzea sustatzeko Euskadiko udalerrietako auzo, herri eta inguruneen hobekuntzan.
Proiektua herrian bultzatzeko, urriaren 9an Udalak informazio-saio bat egin zuen Kasinoan, Matia Fundazioarekin eta Bilbo Lagunkoiako talde eragilearekin, beste udalerri batzuen ibilbide luzea eta esperientzia herritarrekin partekatzeko. Izan ere, horixe da, hain zuzen ere, Laudiok jarraitzen duen helburua, Osasunaren Mundu Erakundeak "Laudio Lagunkoia" izenpean sustatutako ekimen horren buru izango den talde eragile bat eratzea. Haren zeregina udalerriaren egungo diagnostikoa zehaztea izango da, hainbat ekintza eta programa abian jarri arte. Talde honetan parte hartu nahi dutenek 94 403 48 54 telefonora deitu dezakete.
"Laudio Lagunkoia Laudioko bizilagun nagusien ongizaterako pentsatuta dagoen programa bat da. Udaletik herritar talde hau animatu nahi dugu proiektu honetan parte hartzera, beraiek izango dira eragile nagusiak eta parte-hartze saioen bidez gai garrantzitsuak jorratuko dituzte, hala nola partaidetza eta gizarte ehuna, errespetua eta gizarteratzea, gizarte eta osasun zerbitzuak eta eraikin eta espazio publikoak", zehaztu du Aitor Fernández de Pinedo Gizarte Kohesiorako zinegotziak.