Gaurtik eta datorren igandera arte, laudioarrek aukeratu ahal izango dituzte zeintzuk musika talde nahi dituzten 2025eko Sanrokeetan, abuztuaren 16, 17 eta 28ko kontzertuetan zehazki. Gauzak horrela, jaien lehen larunbaterako, abuztuak 16, Iseo & Dodosound, Chambao, The Baboon Show, J Martina eta Ana Tijoux taldeak proposatu dira. Abuztuaren 17rako, Su ta gar, Xiberoots, Süne, Merina Gris eta Bengo izango dira aukerak, eta abuztuaren 28rako S.A., Mägo de Oz, Lendakaris Muertos, Ladilla Rusa eta León Benavente.
“Herritarrek prozesua gogoz hartzea espero dugu. Proposatutako musika taldeak Jai lan taldearen bilera irekira ekarritakoak izan dira. Aurten euskara eta emakume musikariak osatutako taldeak egotea bermatuko dugu”, aurreratu du Jaietako zinegotziak Sonia Respaldiza.
Bozketa zabalik igandera arte
Bozketa prozesua online bidez izango da, Laudio Udalaren webgunearen bitartez. Aurrez aurre bozkatzea nahiago dutenek, udaletxeko sarreran, 11:00etatik 14:00etara, Herri Laguntzaileak izeneko udal langileen laguntzarekin aukera izango dute, astelehenetik ostiralera.