Laudioko tokiko merkataritzaren lehiakortasun, berrikuntza eta jasangarritasunerako estrategia berriak garatze aldera, Udalak “Laudio Zero Plastic” kanpaina jarri du abian herriko 37 negoziotan. Proiektu integral hau Industria, Merkataritza eta Turismo Ministerioaren Suspertze, Transformazio eta Erresilientzia Planaren barruan kokatzen da, Next Generation EU funtsen bidez, eta merkataritza, zerbitzu eta ostalaritzako negozio-kudeatzaileei eta bezeroei zuzenduta dago.
Oraingo honetan, kanpaina 5 ostalaritza establezimendutan, 22 saltokitan eta 10 janari-dendatan garatuko da helburu batekin: tokiko saltokiak eta kontsumitzaileak plastikoaren gehiegizko kontsumoak eragindako kutsaduraren ondorio negatiboen inguruan sentsibilizatu. “Kanpaina hil honetan zehar garatuko da eta plastikoen erabilera murrizteko jarraibide, baliabide eta ohitura jasangarriak eskainiko ditu”, zehaztu du Iñigo Martínezek, Laudio Haziko zinegotziak.
Datozen egunetan beraz, Laudioko 37 negoziok inprimaki bat jasoko dute plastikoaren erabilera arduratsuaren inguruko jardunbideekin, bai eta etorkizunean plastikoen erabilera murrizteko argibideekin ere. “Laudioko mapa interaktibo bat egingo da, non saltokiak erakutsiko diren, haietako bakoitzak plastikoaren erabilera minimizatzeko eskaintzen dituen aukerekin”, gehitu du Martinezek.
Horrez gain, ekimenean parte hartuko duten saltokiek bereizgarri bat jasoko dute “Laudio Zero Plastic” kanpainarekiko konpromisoa aitortzeko. Plastikozko material ordezkatuko dituzten beste material batzuk ere; kristalezko tuperrak eta botilak eta jutezko poltsak, besteak beste, Udaletxeko sarreran banatuko dira, Herri Laguntzaileen bitartez.
“Laudio Zero Plastic” kanpainan parte hartzeko edo zalantzak argitzeko, interesdunek informazio gehiago lor dezakete merkataritza@laudio.eus helbide elektronikoaren bidez edo Laudio Hazi Garapen Agentziako telefonora deituz: 94 403 49 80.