Azken urteotan Laudio Udalak hiri-espazio atsegina eta, batez ere, herritarrei eskainia lortze aldera, herriko hainbat eremu oinezkoentzat bihurtzeko bidea hartu du; Ezka Kalea eta Alberto Acero plaza kasu. Gauzak horrela, eta Udalak oinezkoentzako espazioen Udal Ordenantza bat egiteko hasitako prozeduraren emaitza ez duen bitartean, behin-behineko txartel bat emango die espazio horietan erroldatuta dauden auzokideei martxoaren 3tik aurrera.
“Hiri-jasangarritasunaren helburuetako bat beren ingurunea kudeatu eta gozatu ahal izango duten komunitateak sortzea da, eta, ahal den neurrian, hirigunean trafiko pribatuaren presentzia mugatzea. Laudiok ere hori bilatzen du, beti ere bizilagunen beharrei erantzuten”, adierazi du Ainize Gastaka alkateak.
Neurri honen xehetasun guztiak Ezka Kaleko eta Alberto Acero Plazako auzokideei aurkezteko, atzo Udalak bilera irekia deitu zuen Kultura Etxeko erakusketa gelan.
Berton, aditzera eman zen txartela indarrean sartuko dela martxoaren 17tik aurrera.
Txartela eskuratzeko baldintzak
Martxoaren 3tik aurrera Ezka kalean, Alberto Acero Plazan edo Batzalarrin kaleko 10. zenbakian erroldatuta dauden laudioarrek, oinezkoentzako guneetan aparkatzeko zirkulazio txartela eskuratzeko eskaera egin ahal izango dute.
Behinbehineko txartel horrek gehienez 30 minutuko aparkamendu baimena ematen du eta eskuratzeko, herritarrak hurrengo baldintzetako bat bete behar du: 0-2 urte edo 70 urte baino gehiago izatea, mugikortasun aldetik behin-behineko muga izatea; edo kronifikatu diren mugikortasun funtzionaleko arazoak izatea.
Txartelak eskuratzeko eskabideak HAZ zerbitzuan aurkeztu beharko dira eskatzailearen argazki batekin (txartel tamainan) eta, hala badagokio, mugikortasuna muga bat dagoela egiaztatzen duen dokumentazioarekin batera.
Edozein kasutan, Udalak gogorarazi nahi du prozedura honen bidez emandako txartelak behin-behineko balioa dutela, oinezkoentzako espazioen erabilera arautzen duen Udal Ordenantza indarrean sartzen denean behin betiko neurriak ezarri arte.