Apirilaren 11n Laudio Dolumin Barikuko jaian murgilduko da berriro, lehen sektorearen erakusleiho bihurtuz beste urte batez. 131. edizio honek, Laudioko Aberedunak Abeltzainen Elkarteak Udalarekin elkarlanean antolatua, goizeko 08:30etik gaueko 22:00ak arte luzatuko da.
Dolumin Barikuko azoka 14:00ak arte egongo da laudioarren eta bisitarien esku Herriko Plazan, Aldain eta Alberto Aceron; Laudioko Gaiteroen, Izalde trikitilarien eta Kittu taldearen musikaz eta doinuez girotuta.
Oraingo honetan, ganadu erakusketak behi- eta zaldi-aziendako 60 bat buru bilduko ditu, 23 ardi- eta ahuntz-loterekin batera. Ganadu azokaz gain, urtero bezala, bertako produktu eta artisautza azokako postuak -70 inguru- eta nekazaritzako makineria ere izango dira Aldain, Alberto Aceron eta Herriko Plazan.
Horrez gain, zaldien ferraketa izango da Laudioalde Lanbide Eskolaren ondoko parkinean, 10:00etan, eta Euskal ardi moztaileen elkarteak erakustaldia egingo du Aldai plazan 11:00etan.
Txikienek ere ekintzak izango dituzte baina arratsaldez, 17:00etatik aurrera, Aldai plazan antolatuko diren herri kirolekin. 19:00etatik aurrera musikak Laudioko gune guztiak hartuko ditu, Punkzaharrak taldearen elektrotxarangarekin (19:00), Ekin Joleak taldearen kalejirarekin (19:30), Santa Luzia Abesbatzaren kontzertuarekin (20:00) eta Zirkinik bez taldearen emanaldiarekin (22:00).
Jaiak hurrengo egunean helduko dio amaierari, 20:00etan Lamuzako Done Petri Elizan Andere Abesbatzak eskainiko duen kontzertuarekin.
Mozketak trafikoan
Itzuliaren 5.etapa Laudiotik Dolumin Bariku egunean igaroko da, ondorioz, A-625 eta Bi-625 moztuta egongo dira 13:00etik 15:00ak arte.