Aurten laudioarrek bat egin dute 2025eko Sanrokeetan abuztuaren 16, 17 eta 28an izango diren musika taldeen aukeraketarako herri bozketarekin. Hori horrela, astebetez, zehazki otsailaren 17tik 23 bitartean, 1.041 boto jaso ziren guztira. "Oso emaitza pozgarria da, parte-hartze handia eman delako. Laudion herriko jaiekiko dagoen interes handiaren erakusle dira datuak; gainera, eszenatokian emakumeak eta talde euskaldunak egotea bermatu da", goraipatu du Sonia Respaldiza Jaietako zinegotziak.
Bozketan lortutako emaitzak positiboak izan badira ere, prozesua abiatu zenetik, sareetan topatutako eduki batzuk alarmak piztu zituen herriko hainbat mugimendu eta eragileengan; zehazki abuztuaren 28rako ateratako musika taldearekin.
“Herritarren babesa eta iritzia geure lanaren erdigunean dago, eta kezka hau sortu izanak prozesua moteldu du. Parekidetasun eta berdintasunaren aldeko pausuak ematen jarraituko dugu; hori dela eta bozkatuen izan den bigarren aukera lehenetsiko da, hala adostu delako ere jaietako lan taldearekin baita herriko eragileekin ere”, zehaztu du zinegotziak. Edozein kasutan, Kuadrillen eguneko kontzertua ez da argitaratuko ekainera arte.
Bitartean, laudioarrek jaietako lehen larunbaterako, abuztuaren 16rako, San Roke egunerako, La Mari buru duen Chambao taldea izango du, proposatutako bost aukeren artean bozkatuena. Eta hurrengo egunean, San Rokezar egunean, Su Ta Gar talde euskalduna igoko da Zumalakarregiko eszenatokira. Nolanahi ere, Udalak ez dio utzi aurtengo Sanrokeen egitaraua diseinatzeko lanari, eta 29rako Bulego taldearekin kontzertua itxi du.
Azpimarratzekoa da, herri-bozketaren lehen proposamen honek harrera oso ona izan duela. Ildo horretan, boto-emaileen %55 emakumeak izan dira. Adin-taldeei dagokienez, 30 urtetik beherakoen parte-hartzea %30ekoa izan da, 30-60 urteko pertsonena %59koa, 60 urtetik gorakoena, berriz, %11koa.
Bulego, Jai Batzorde Irekiak aukeratutako taldea
Bulego talde azkoitiarra aukeratu du Jai Batzorde Irekiak abuztuaren 29an, Baserritarra Egunean, Zumalakarregi agertokian aritzeko. Ildo horretan, agertoki nagusiko musika-programa ahalik eta lasterren ixteko asmoz, Bulego taldea zuzenean kontratatzea erabaki zuen, agenda kontuak tarteko. Bestalde, Zumalakarregiko gainerako kontzertuak bozketaren bidez erabaki dira.
Aurrerantzean, jai-egitarauko gainerako musika-emanaldiak eta proposamenak zehaztuko dira.