Joan den apirilaz geroztik, laudioarrek aukera izan dute Laudioko etorkizuna definituko duen Hiri Antolamenduko Plan Orokorraren (HAPO) lehen aurrerapen-zirriborroa ezagutzeko eta horri buruz hausnartzeko. Orain, eremu bakoitzeko proposamenak eta udalerri mailan aurreikusten dituen jarduketak aztertu direla, Udalak beste urrats bat eman nahi du bizilagunen eskutik, eta Aretan kokatzen den Lipmesa fabrika zaharraren lurren erabilerak eztabaidatu nahi ditu.
"Espazio horrek premiazko jarduketak behar ditu, hamarkada bat baino gehiagoan abandonatutako industria-eremua izan da eta, gainera, Aretaren erdigunean kokatuta dago. Gaur egun oztopo bat da Aretaren kohesio eta elkarbizitzarako", adierazi du Ainize Gastaka alkateak. Hain zuzen ere, HAPO berriak planteatzen duen ardatzetako bat da lurzoru industrialak berroneratzea, espazio publikoak indartzea eta konektatzea da, eta egungo behar sozialetara egokitzen diren etxebizitza-eredu berriak eraikitzea. Gauzak horrela, eta azterlanak zehazten duenaren arabera, lursail horren kokapena ezin hobea da proiektu berriak "modu azkar batean garatzeko”.
"Udal talde tekniko eta politikotik uste dugu hirigintza-ekintza arin eta garrantzitsu bat eragin dezakeela etxebizitzaren eta Aretako hiri-hobekuntzaren eremuan, gure herriak behar duen eraldaketa sakonean aurrera egitea ahalbidetuz. Hasieratik nolakoa izan behar duen auzotarrek beraiek erabakitzea nahi dugu", aurreratu du alkateak. Arrazoi hauengatik, ekainaren 25ean, 18:00etan, Udalak batzar bat egingo du Aretako Kultura Etxean, herritarrekin batera eremuaren etorkizuneko erabilerei eta aukerei buruz hausnartzeko.
"Berroneratzeak aukera emango luke ingurunea biziberritzeko, biztanle berriak erakartzeko, bereziki gazteak, eta inguruko ekipamenduak eta zerbitzuak hobetzeko, tren-geltokiarekiko lotura indartuz eta espazio publiko berriak eta hobeak sortuz", gehitu du Gastakak. Hirigintza-jarduketari buruzko dokumentazioa, enpresaren proposamena dena eta Planak jasotzen duena, egun horretan bertan jakinaraziko da, Aretako herritarrek esku hartzeko eta garapen onena aztertu, eztabaidatu eta erabaki dezaten.
Udalak auzotarrak animatu nahi ditu prozesu honetan aktiboki parte hartzera, Aretaren etorkizun integrala, eta ez bakarrik eragindako lurzatiarena, modu bateratuan definitzeko aukera delako. Hori dela eta, batzarraren ondoren, gai honetaz hausnartzeko, beste toki-erakunde batzuekin aztertuko da proiektua.