Laudio Udalak atzoko osoko bilkura baliatu zuen Palestinak bizi duen egoera salatzen duen mozioa aurrera ateratzeko. Mozioa, ekain hasieran Eusko Legebiltzarrean PSE-EEk, Sumar, EAJ eta EH Bildu alderdiek onartutako testua oinarri izanda, lau alderdiek sinatu zuten “Israelgo Estatuak Gazan egindako genozidioa salatzeko”.
“Su-eten iraunkorra eta berehalakoa eskatzen da, baita Israelek okupatutako lurraldeetatik erretiratzea eta nazioarteko zuzenbidea eta giza eskubideak errespetatzea ere. Baita Gazarako laguntza segurtatzea eta Israelgo okupazioaren bukaera exijitzen dira”, azaldu zuen Carmen Altuna Gizarte Kohesioko zinegotziak.
Horrez gain, Udaletxeko alderdiek ere osasun sistemaren eta gizarte zibilaren aurka emandako erasoak salatu zituzten; ospitaletan, osasun-langileen, kazetarien eta humanitarioen aurkako erasoak gaitzetsiz. Europar Batasunari eta nazioarteko erakundeei ere eskatu zitzaien Israelgo armen salerosketa etetea, euren politikak berrikustea eta nazioarteko ikerketak babestea.
Ildo horretan, UNRWA agentziaren garrantzia azpimarratu zen eta haren finantzazioa eta agintaldia babesteko eskaria ere. Gauzak horrela, Udalak bere elkartasun aktiboa adierazi zuen Palestinako herriarekin eta giza eskubideen defentsarekin. “Gure elkartasun eta konpromisoa adierazi nahi dugu. Azkenik, hemendik ere, LaudioPalestina taldeari haien jarduna eskertu nahi diogu”, amaitu zuen zinegotziak.