Gutxi falta da Laudio Azoka (Abasto) Plaza errealitate bihur dadin. Joan den astelehenean jaso ziren hornikuntza-faseari dagozkion azken ekarpenak, eta ostalaritza-gunea ustiatzeko kontratazio-prozesua abian jarri du orain Udalak. Bihartik hasita, 15 egun natural izango dute interesa duten pertsonek eskabideak aurkezteko Euskadiko Kontratatzailearen Profilaren bidez.
Esperientzia eta kaudimen ekonomikoa zein teknikoa egiaztatzeaz gain, pertsona edo enpresa lizitatzaileek une oro bermatu beharko dute euskarazko arreta.
Aurreikuspenen arabera, abenduan abiaraziko da jarduera, eta 15 urteko indarraldia izango du kontratuak. Oinarriak udal webgunean aurki daitezke.
Gune berdeak, gerizpean egoteko lekuak eta eserlekuak
Guztira jaso diren 22 ekarpenetan, landaredia ugaritzea eta gerizpe guneak sortzea izan dira proposamen errepikatuenak. Helburuok betetze aldera, landarezko pergola bat edo itzala emateko oihal bat paratzeko proposamena luzatu diote herritarrek Udalari. “Laudioarrek gune berdeak, eserlekuak eta gerizpean egoteko lekuak behar dituzte", azaldu du Laudio Haziko zinegotzi Ludi Temiñok.
Halaber, Laudioko ondarea eta nortasuna erakusteko eskulturak edo bestelako proiektu artistikoak bideratzea proposatu da; oihalezko liburu erraldoi batean udalerriko pertsona ospetsuenen historiak eta bizitzak jasotzea, adibidez “Orain, bildutako ekarpen guztiak aztertzen ari gara, herritarren gozamenerako leku bat sortzeko helburuarekin”, biribildu du zinegotziak.