Gaurko informazio-batzordea eginda, Laudioko Udalak 2026ko ekitaldirako ordenantza fiskalak prestatzeko lanei heldu die jada. Ordenantzen dokumentuek berebiziko garrantzia dute datorren urteko udal-politika ekonomikoa eta fiskala zehazteko.
Udal-gobernu taldearen helburua da herritarren beharretara egokitutako ordenantzak lortzea, bidezkoak, orekatuak eta jasangarriak izango diren ordenantzak, udal-zerbitzuen kalitatea eta herritarren ongizatea bermatzekoak.
Horiek horrela, elkarrizketa- eta lankidetza-giroan bideratuko da prozesu osoa. “Gainerako udal-taldeei eskua luzatzen diegu egokitzat jotzen dituzten ekarpenak egin ditzaten. Adostasuna eta elkar-ulertzea ditugu xede, sendo uste baitugu elkarlana beti izaten dela Laudio herriaren mesederako. Izan ere, gainerako alderdien onespena eta aldeko botoa beharrezkoa izango da”, adierazi du Iñigo Martinez Cerrillok, Ogasuneko zinegotziak.
Urteko KPIaren (Kontsumoaren Prezioen Indizea) bilakaera kontuan hartuta, Udal Gobernuak batzordean proposatu du udal zergak —OHZ, Ibilgailuen Zerga, EIOZ eta Plusbaliak— % 2 eguneratzea. Gainerako tasak eta prezio publikoak, zabor-tasa izan ezik, izoztuta mantenduko dira. “Legealdia hasi zenean aldaketa sakonak egin eta onartu genituen: OHZn diru-sarreren hobaria erabat aldatu eta hutsik dauden etxebizitzen gaineko errekargua ezarri genuen. Horregatik, aurten ez dugu aldaketa handirik sartuko ordenantzetan”, azaldu du Ogasun zinegotziak.
Deialdiaren bidez, Laudioko Udalak berretsi egiten du herritarren ongizatea helburu duen kudeaketa arduratsu eta partizipatiboaren aldeko apustua, erakundeen arteko lankidetzan eta interes orokorrean oinarritutakoa.