Azaroaren 2tik aurrera, Zineforum programa berreskuratuko dute laudioarrek: Kasinoan izango da, igandeetan, eta, estreinako saioan, Jone batzuetan eskainiko da. Euskarazko obra honetan, Sara Fantova zuzendariak protagonistaren hazkunde psikologiko eta emozionala erakutsiko digu, haurtzarotik helduarora igarotzen den bitartean. Gaztelaniazko azpitituluak ditu.
Hurrengo filma, Los domingos, azaroaren 9an proiektatuko da. Alauda Ruiz de Azúa zuzendariaren filmak Urrezko Maskorra lortu du aurtengo Donostia Zinemaldian, nazioarteko zinemaldiko filmik onenari ematen zaion sari nagusia, alegia. Azkenik, azaroaren 16an, On Falling ikusteko aukera izango da. Laura Carreiraren film horretan, gizateriaren minbizi handi gisa irudikatzen da eguneroko lanaren errutina.
“Aurten ere, istorio zoragarriak dauzkaten film ezberdinak izango ditugu, baita saritutako obrak ere. Gainera, emanaldi bereziak izango dira Eguberrietan ere”, adierazi du Sonia Respaldizak, Kultura eta Kirol Azpiarloko zinegotziak.
Abenduko zineforumaren egitaraua datozen asteotan iragarriko da.