Azaroaren 17tik 30era arte, laudioarrek Ana Valiño artistaren «El viaje de las Mujeres del Desierto» erakusketa ikusteko aukera izango dute Kultura Etxean.
Argazki erakusketa errefuxiatuen kanpamentuetan egindako lanetik sortu zen eta 23 irudik osatzen dute. «Saharako emakumeen eskubideen defentsa aldezteko erakusketa da hau. Denboran zehar emakumeek bideratu dituzten borroken historiak berreraikitzeko baliatzen ditu argazkiok autoreak», azpimarratu du Gobernantza Feministako zinegotzi Nagore Gomarak. Izan ere, ahaztutako emakume horiei guztiei aurpegia eta izena jartzea helburu, iragana berridazteko
eta oraina ulertzeko ikerketa sakon bati ekin dio memoriaren bidez Ana Valiñok proiektuarekin.
Bestalde, azaroaren 19an (asteazken), «Ocupación SA» dokumentala proiektatuko da Kultura Etxeko Arraño Aretoan, 18:30ean. Dokumentalean, Mendebaldeko Saharako esplotazio ekonomikoan ardura duten enpresari nahiz politikari espainiarren izen-abizenak ezagutzera emango dira hainbat testigantzaren bitartez.
Gainera, proiekzioaren harira, Sahara Lautada elkarteko Aminetu Ahmed Baba eta Mundubat elkarteko Fernando Vaquerizo arituko dira hizlari. Ekintza guztiak Mundubat elkarteak antolatu ditu, Udalarekin elkarlanean.