Beste urte batez Laudioko Udalak, Hizkuntza Normalizaziorako Zerbitzu-unitatearen bitartez, eta udalerriko elkarte eta ikastetxeekin batera, abenduaren 3an ospatzen den Euskararen Nazioarteko Egunarekin bat egiteko egitarau zabala prestatu du, euskara herriko toki guztietara eramateko. “Euskararen aldeko konpromisoa urte osoan zehar eraikitzen da: eskolan eta etxean, kalean eta sarean, kultura ekimenetan eta eguneroko hautu txikietan. Euskaraz eginez irabazten dugu denok”, adierazi du Nagore Gomara Hizkuntza Politiketarako zinegotziak.
Ekitaldiak ostiral honetan, hilak 28, hasiko dira eta abenduaren 6ra arte luzatuko dira, euskara ardatz izango duten hainbat jarduerekin. Izan ere, ostiralean, Bai Euskarari Elkartearen eskutik hainbat enpresa bisitatuko dira, Lazarraga sariak aintzat hartuta, beste enpresentzat eredu bilakatzeko. Arratsaldez, Kasinoan bertso-saioa izango da Aitor Bizkarra, Ane Zuazubiskar, Xabat Galletebeitia eta Andoni Egañarekin. Oraingo honetan Iñaki Cabeza izango da gai-emailea.
Asteburuan zehar euskara protagonista jarraituko da izaten. Larunbatean “euskara jokoak” egingo dira Aldai plazan, bai eta Euskararen Makila banatuko zaie
Laudioko euskal idazleei. Horrez gain, txikienek tailerrak izango dituzte arratsaldez Gardeako Kulturgunean. Igandea osatuko da eskualde osorako euskara jaiarekin, aurten, Okondon; eta Santa Lucía abesbatzak giroa ziurtatuko du herriko kaleetatik prestatutako kantu-emanaldiarekin. Halaber, arratsaldeko 19:00etan Akelarre dokumentala proiektatuko da Kasinoan.
Abenduko lehen asteari dagokionez, Araban euskara sustatzeko planaren aurkezpen ekitaldia egingo da Aldundiko eta Udaleko ordezkarien parte-hartzearekin (abenduak 1), gazteei zuzendutako “Xare” jardunaldiak egingo dira(abenduak 2), eta Euskararen Nazioarteko Eguneko adierazpen instituzionala irakurriko da (abenduak 3), herriko ikastetxe, euskaltegi eta ordezkari politikoen parte-hartzearekin. Horrez gain, Aldama arrandegiari eta Jana ile-apaindegiari saria emango zaie euskararen sustapenean duten ibilbideagatik.
Azkenik, Durangoko Azokara joateko autobusa eskainiko da. Txartelak dagoeneko Udaletxean daude salgai, abenduaren 4ra arte.