Laudioko Azoka Plaza, herritarren artean Plaza del Mercado de Abastos izenez ezaguna dena, 1952. urtean inauguratu zen. Garai hartan, aldeetako dendak ez ezik, igandero baserritarrak ere etortzen ziren beren produktuak saltzera, eta herriko bilgune garrantzitsu bihurtu zen. Tradizio horri eusten jarraitzeko, Azoka Plazako bi postu berrietarako lizitazioak abiarazi ditu Laudioko Udalak. Lehen postuan, oinarrizko produktuen salmenta jarduera nagusi duten proposamenak lehenetsiko dira. Bigarrenean, berriz, lehen sektoreari emango zaio lehentasuna, hurbileko ekoizpenak eta 0 km-ko produktuak sustatu eta indartzeko helburuarekin.
Bestalde, Azoka Plazan jada zeuden hiru lokalak —Mari Paz urdaitegia, Ana Mari urdategia eta Toñi arraindegia— berriro horra lekualdatuko dira, 2026 urtearen hasieran. “Zubiko Kurajorekin izandako esperientzia ez errepikatzeko, prozesu osoa beraiekin adostu dugu. Azken helburua merkatariei eta bisitariei esperientzia hobea eskaintzea da”, zehaztu du Ludi Temiño zinegotziak.
Azoka Plazako terraza eta taberna
Bestalde, herritarren parte-hartze bidez jasotako proposamenekin, goiko aldeko terraza atseginagoa eta bereziagoa egiteko ideia berriak lantzen ari da Udala.
“Merkatuak herrian duen garrantzia eta presentzia ikusita, inguruko espazioek ere horrekin bat egin behar dutela uste dugu. Gainera, aldaketa hauekin, baserritarren merkatuari bultzada ematea espero da, haientzat espazio atsegin bat eskainiz”, gehitu du Temiñok.
Azkenik, Azoka Plazan joango den taberna berriro lizitatuko da, aurreko prozesuan esleipena hutsik geratu zelako. Arrazoia espazioa hornitzearen kostua izan zitekeenez, udal-taldeak espazioaren egokitzapena bere gain hartuko du.
“Ostalariak bertan jarri behar den materialaren inbertsioa egin zezala planteatzen zuen lizitazioak; eta hori amortizatu ahal izateko, kontratuaren luzapena handitu egin zen. Hala ere, lizitaziora ez da inor aurkeztu, inbertsioa altuegia delako. Hori dela eta, espazioaren egokitzapena gure gain hartuko dugu, eta herrian jada ostalaritza-zerbitzua ematen duten udal-espazioen formula antzekoa izango du”, azaldu du zinegotziak.
Edonola ere, tabernaren kudeaketaren arduradunak tokiko produktuak lehenetsi beharko ditu, espazioaren izaera errespetatuz. Azoka Plaza eraberritzeko proiektuak aurrera egin du NEXTgeneration dirulaguntzari esker.