Herritarren parte-hartzeak behar bezala funtzionatzen duela bermatzeko, eta eztabaidarako nahiz parte hartzeko organo eta foroei koherentzia handiagoa emateko, Laudio Udalak Gardentasun eta Herritarren Partaidetzarako Araudian aplikatuko diren aldaketen hasierako onespena onartu zuen joan den asteleheneko osoko bilkuran, Korporazioaren gehiengoaren aldezpenarekin. Horrela, eta gobernu taldearen, EAJren eta PSE-EEren aldeko botoei esker, hemendik aurrera Toki Kontseiluaren osaera handituko da, Kontseilu Sektorialen barruan Nagusien Kontseilua sortzea aurreikusiko da, eta, auzo batzarrei begira, erdialdea bi zatitan banatuko da, erdiguneko iparraldea eta erdiguneko hegoaldea.
Edonola ere, alegazioak aurkeztu nahi dituztenek 30 egun balioduneko epea izango dute, ALHAOn argitaratuko den egunaren biharamunean zenbatzen hasita.
Toki Kontseiluari dagokionez, aurrerantzean, gehienez ere, 16 ordezkarik osatuko dute, herritarren erakunde, elkarte edota talde egonkorren ordezkari legez. Osaera hori udal agintaldi bakoitzaren hasieran berrituko bada ere, 2027-2031legegintzaldia indarrean jarri arte, Udalak epe berri bat eskainiko die herritar erakundeei, elkarteei eta talde egonkorrei -enpresak eta sindikatuak-, eskaerak aurkezteko. Nolanahi ere, honako baldintza hauek bete beharko dira: eskabidea idatziz aurkeztea, dagokion kolektiboko ordezkarien gehieneko kopurua bete ez dela ziurtatzea, eta eskabide kopurua ez izatea bete beharreko plaza kopurua baino handiagoa.
Bestalde, aurtengo auzo-batzarren ziklo berrian, Udalak erdiguneko batzarra bitan banatuko du –erdiguneko iparraldea eta erdiguneko hegoaldea–, eremu horretako bizilagunen iritziak eta iradokizunak behar bezala jaso eta erantzun ahal izateko.
“Araudia 2022ko urtarrilean sartu zen indarrean, baina ordutik hona, hobetu beharreko zenbait gai ikusi dira, talde batzuen parte-hartzea behar bezala funtzionatzen duela bermatzeko. Aurreko agintaldian bezala, gobernu taldetik akordioetara heltzeko aldez aurretiko jarrera ona izan dugu beti. Izan ere, aldaketa guzti hauek zenbait batzorde informatiboetan landu dira, adostasun zabalena lortzeko asmoan”, adierazi du Nagore Gomara zinegotziak.