Beste urte batez, martxoaren 8an, Emakumeen Nazioarteko Egunean, Laudiok ez dela egun sinboliko hutsa aldarrikatuko du beste behin ere tokiko eragileek, Udaleko Gobernantza Feministako zerbitzuarekin elkarlanean, prestatu duten egitarau zabalarekin; non kultura, hausnarketa, eta kirola uztartuko diren.
“Eskubideen aldarrikapenerako egun honetan, berriz eskatzen diegu herritarrei antolatutako ekimenetara batzera. Benetako berdintasunaren aldeko aldarrikapena ez da soilik emakumeena, gizarte osoaren konpromisoa da”, adierazi du Nagore Gomara Gobernantza Feministako zinegotziak.
Aurten programak hainbat ekintza bilduko ditu: emakume irakasleen lana omenduko duen ANONIMAK ikuskizuna (martxoak 7); Estibaliz Linaresek eskainiko duen ziber-indarkeria matxistaren inguruko hitzaldia euskaraz (martxoak 10); Emagin elkarteak moderatura, herri zaintzaile gisa, Usurbilen eta Hernanin egindako ibilbidea aztertuko duen mahai-ingurua (martxoak 12); eta emakumeek kirol esparruetan duten protagonismoa azpimarratzeko ere Emakumeentzako Palde-Txapelketa (martxoak 6 eta 7) eta emakumezkoen futbol partida (martxoak 28) egingo dira. Horrez gain, Emakumeen Nazioarteko Egunean ez da faltako Solastiar eta Etawasol elkarteek Herriko Plazan antolatutako elkarretaratzea (13:00).
Nolanahi ere, egitaraua martxoaren 6an, ostirala, hasiko da Herriko Plazan ohiko adierazpen instituzionalaren irakurketarekin, goizeko 12:00etan; eta arratsaldez jarraituko du Kasinoan empodeRaras antzezlanarekin (18:30).
“Laudion argi dugu berdintasunean oinarritutako herria ezin dela egun bakarrean eraiki; baina Martxoaren 8ak aukera ematen digu elkarri entzun eta berdintasunaren aldeko bidea berritzen jarraitzeko. Laudio feminista, zaintzaile eta parte-hartzaileago bat eraikitzea guztion lana da”, azpimarratu du zinegotziak.
Ekimenek martxoa hartuko dute
Horretaz guztiaz gain, laudioarrek martxoaren 22an VII. Berdintasunaren aldeko ibilaldi neurtura batzeko aukera izango dute, 10:00etatik aurrera. Ekintzak arratsaldean jarraituko dute Kasinoan “Gaua” filmarekin.
Emakumeen Nazioarteko Eguna aldarrikatzen jarraituko du Laudiok martxoaren 24an Lezeaga Aretoan izango den online solasaldiarekin, non pornografiaren sexu- politika aztertzeko aukera egongo den, Mónica Alario Gavilanen eskutik.
Azkenik, aurten ere, herriko elkarteek iaz beren erara moldatutako Elektrizitatea abestiaren bideoklipa (Zea Mays taldearena) gogoratuko da. “Oso hunkigarria izan zen eta emaitza ikusgarria lortu zuten; oraindik ere emozioz gogoratzen dugu, eta oraingoan gure ekintzen egitarauan gogoan izango dugu”, biribildu du zinegotziak.