Landaluze 27an kokatzen den udal eraikinak, 300 metro karraturekin eta solairu bakarrean banatuta, laster auzoko bizilagunen topagune bihurtuko da. Udalak, Herritarren Partaidetzarako Unitatearen bidez, parte-hartze prozesu bat jarri du abian, lokalaren etorkizuneko erabilera zehazteko eta ingurunearen beharrak identifikatzeko. “Herritarrak proiektuaren motorra izatea nahi dugu; horregatik, proiektuaren diseinuan aktiboki parte hartzea behar dugu, elkargune, gozamen eta bizikidetza gune bihurtzeko”, adierazi du Nagore Gomara arloko zinegotziak.
Proposamenak egin nahi dituzten herritarrek aukera izango dute maiatzaren 28ra arte, herritarren partaidetzarako plataformaren bidez, partaidetza@laudio.eus
helbidera mezu elektroniko bat bidaliz, edo ekainean zehar egingo diren parte-hartze saioetara bertaratuz. “Oraingoan, herritarrek beste pertsona batzuek egindako ekarpenak eta proiektuaren bilakaera kontsultatu ahal izango dituzte web plataforman”, aurreratu du zinegotziak. Era berean, eta Landaluze auzoaren beharrak identifikatzeko, laudioarrek ere galdetegi bat izango dute eskura, plataforman bertan edo Udalaren beheko solairuan eskuragarri.
Talde eragilea
Prozesu hori guztia amaitu ondoren, Udaleko Partaidetza Unitateak prozesuaren emaitzak argitaratuko ditu eta dokumentu bat osatuko du, proiektua gauzatzeko gida eta oinarri izango dena. Zeregin horretan talde eragileak lan egin beharko du, eta Landaluzerekin lotura duten 14 pertsona gehienez osatuko dute. “Talde honen helburua besteok entzutea eta ekarpenak jasotzea da, baita bizilagunekin eta inguruko kolektiboekin elkarrizketa erraztea ere. Bildutako informazio guztia ordenatzen eta lantzen hasteko lehen urratsa da hau”, azaldu du Gomarak.
Izan ere, talde eragileak egindako lanetik abiatuta, ekainean Udalak parte-hartzeko saio berriak deituko ditu herritarrak espazioaren funtzionamenduan eta kudeaketa ereduan inplikatzeko.