Emakumeen Nazioarteko Eguna aldarrikatzen jarraitzeko asmoan, Laudiok gaur egun indarrean dagoen zaintza ereduan jarri nahi izan du arreta, askotan emakumeen doako lanean, zaintzaileen prekaritatean eta emakume migratuen arrazializazioan oinarritzen delako. Izan ere, Euskal Herria errealitate demografiko baten atarian dago, eta aurreikuspenen arabera, 2036rako 65 urtetik gorako pertsonak biztanleriaren %25-30 izango dira. Hori guztia dela eta, eta zaintzaren inguruko eredu berriak eta tokikotik bultzatzen ari diren esperientziak ezagutarazteko helburuarekin, atzo Lezeaga Aretoak mahai-inguru bat hartu zuen non parte hartu zuten Usurbil eta Hernaniko alkateak.
Solasaldia Emagin elkarteko kide batek moderatu zuen, zaintza eskubide unibertsal gisa ulertzeko beharra eta bizitzaren iraunkortasuna erdigunean jartzearen aldaketaren garrantzia azpimarratuz. Mahai-inguruan Usurbilgo alkate Agurtzane Solaberrietak eta Hernaniko alkate Xabier Lertxundik parte hartu zuten, azken urteotan beren udalerrietan zaintza komunitarioaren alde egindako urratsak azalduz. Halaber, Ainize Gastaka Laudioko alkateak ere hitza hartu zuen, udalerritik bertatik zaintzaren inguruan ematen ari diren pausoak eta etorkizunerako erronkak partekatzeko.
“Horrelako mahai-inguruak egitea funtsezkoa da zaintzaren inguruko ikuspegia partekatzeko eta tokiko komunitateek izan dezaketen rola indartzeko. Udalerri batek erreferente izan nahi badu, zaintza eskubide unibertsal gisa aitortu behar da, eta administrazioak interes komunitarioa lehenesteko konpromiso irmoa hartu behar du, lurraldearekiko lotura indartuz eta pertsonen arteko zapalkuntza egiturak ezabatuz” azaldu du Nagore Gomara zinegotziak.
Parte-hartzaileek herri zaintzaile bat eraikitzeak zer esan nahi duen azaldu zuten: nondik hasi, zein politika publiko eta komunitate sare behar diren, eta nola bihur daitezkeen udalerriak zaintzaren antolaketa eraldatzeko laborategi. “Jarduerak zaintza erdigunean jarriko duen eredu sozial, ekonomiko eta ekologiko berri baten inguruko hausnarketa kolektiboa sustatzea zuen helburu, herri zaintzaileak eraikitzeko beharrezkoak diren aliantzak eta konpromisoak indartuz”, gehitu du zinegotziak.