Laudioko kultur panoramak aldaketa sakona biziko du datozen hilabeteetan. Urteetako lanaren eta itxaronaldiaren ostean, herriko azpiegitura nagusietako bat,
Antzoki berria, azken txanpan dago, herritarrei eta eragileei espazio bizi eta erabilgarriak eskaintzeko atarian.
“Datozen hilabeteak garrantzitsuak izango dira Laudioko kulturaren etorkizunerako. Antzokia martxan jartzeak herriko bizitza sozial eta kulturalean eragin zuzena izango du, eta bide horretan herritarren eta eragileen parte-hartzea giltzarri izango da”, adierazi du Ainize Gastaka alkateak.
Izan ere, Udalaren helburua Antzokia eskualdeko kultur erreferente bihurtzea da: herriko talentuaren erakusleiho, kultur erreferentziak hurbiltzeko gune, eta gaur egungo kultur eskaintza osatzeko tresna. “Hau guztia inolako kontraprogramaziorik gabe eta baliabideak erarik eraginkorrenean kudeatuz egingo da. Ondorioz, urteko kultur programa elkarrekin irudikatzeko unea da, herriko beste espazio batzuetan garatzen diren ekintzei itzalik egin gabe”, azaldu du alkateak.
Gauzak horrela, eta eraikin fisikoa amaitzen ari den bitartean, Udalak herriko kultur eragileekin lan-saio garrantzitsu bat egingo du maiatzaren 4an. Saioa arratsaldeko 18:00etan izango da, Laudioko Kultura Etxean, eta eraikin berriaren edukia eta mamia lurreratzea izango du helburu.