Joan den apirilaren 22an Landaluze 27ko udal lokalera egindako bisitan bertaratutako 34 herritarrek espazioaren funtzionamenduaren eta etorkizuneko kudeaketaren inguruko ideiak eta proposamenak eztabaidatu zituzten; bai eta etorkizunean ekipamendu komunitario gisa izango dituen aukerak irudikatu zituzten ere.
“Bisitan, Talde Eragilearekin egindako lehen aurrerapenak partekatu ziren, baita prozesu parte-hartzailearen helburuak, faseak eta hurrengo urratsak ere. Saioa izaera informatiboa izan zuen nagusiki, eta zalantzak argitzeko eta auzokideak ekarpenak egiten jarraitzera animatzeko ere balio izan zuen”, azaldu du Nagore Gomara zinegotziak.
Proposamenak sortzeko lan-saioa ez bazen ere, bisitak espazio errealari buruzko eztabaida kokatzeko aukera eman zuen. Edonola ere, erabilerei, banaketari, funtzionamenduari edota kudeaketari buruzko etorkizuneko ideiak lurreratzeko, prozesuak beste hiru topaketekin jarraituko du.
Horiek horrela, lehen saioa datorren asteazkenean, maiatzaren 13an, izango da, eta lokal hau zertarako nahi den abiapuntu izango du. Bigarrena maiatzaren 27an burutuko da eta espazio fisikoaren beharrei eta haren antolaketari helduko zaio; eta azken eta hirugarren saioa ekainaren 3an izango da, eta emaitzak partekatu eta hurrengo urratsak zehazteko balioko du. Gainera, auzokideek hala eskatuta, saioak Landaluze 27an izango dira.
Komunikazio arin bat mantendu ahal izateko, WhatsApp kanal bat sortu da ere, eta edonork egin dezake bat harekin, hurrengo estekaren bidez: https://labur.eus/Landaluze27WhatsApp.
Maiatzak 28 ekarpenak egiteko azken eguna
Laudio Udalak gogorarazi nahi du ere ekarpenak jasotzeko fase publikoak irekita jarraituko duela maiatzaren 28ra arte, www.landaluze27.eus eta Udalean eskuragarri dagoen formularioaren bidez. Orain arte egindako ekarpenak esteka honetan ikusgai daude jada: https://landaluze27.eus/processes/landaluze27/f/5/proposals.