Aurtengo Sanrokeak iragarriko dituen kartel lehiaketa martxan da. Aurreko edizioetan bezala, 6 eta 13 urte bitarteko adingabeentzako lehiaketa bat egongo da, Laudioko haurrei zuzenduta, eta beste bat 14 urtetik gorakoentzat, non bertakoa izatea ez den baldintza. Parte-hartzaile bakoitzak nahi beste lan aurkeztu ahal izango ditu, betiere originalak eta argitaratu gabeak badira, teknika librekoak eta aurretik saririk jaso gabeak.
Lanak JPG formatuan aurkeztu beharko dira udal webgunean (www.laudio.eus) eskuragarri dagoen formularioaren bidez, eta ezin izango dute egilearen identitatea ezagutzeko aukerarik eman. Gainera, derrigorrezkoa izango da Laudioko armarri ofiziala eta ondorengo testua txertatzea: “SANROKEAK 2026 –LAUDIO JAIETAN. ABUZTUAK 15, 16, 17, 26, 27, 28, 29 eta 30”. Irudiek 820x1171 pixeleko neurria izan beharko dute, eta gehienez 2 MB-ko pisua. Umeek, nahi izanez gero, lanak DIN-A4 formatuan ere aurkeztu ahal izango dituzte.
Ekainaren 23ra arte, egun hori barne, egongo da lehiaketan parte hartzeko aukera. Sariei dagokienez, helduen kategoriako lan irabazlea 2026ko Sanroke jaien irudi ofiziala bihurtuko da eta 1.200 euroko saria eskuratuko du. Haurren kategorian, berriz, irabazleak 250 euroko balioa duen material didaktikoaren sorta eskuratuko du, herriko saltokietan erostekoa.
Kartel irabazlea bi fasetan aukeratuko da: lehenik, epaimahai teknikoak aurre-hautaketa egingo du, eta ondoren, hautatutako lanen artean epaimahaiaren eta herritarren bozketen bidez erabakiko da irabazlea.