Programazioa asteartean, ekainak 23, hasiko da, 18:30ean, Lezeaga Aretoan, Irantzu Varela idazle eta kazetari feministaren ‘Darle fuego a Bilbao’ eleberriaren inguruko literatur topaketarekin. Natalia Alvarezek dinamizatuko du solasaldia eta lanaren gai nagusietako batzuk jorratzeko aukera emango du, hala nola, desira, adiskidetasuna, militantzia, hiria agertoki politiko gisa eta memoria feminista.
Aste berean, Udalak LGTBIQ+ Kolektiboaren Sexu Askapenaren eta Harrotasunaren Nazioarteko Egunerakin bat egiteko adierazpen instituzionala onartuko du, eta Harrotasunaren Bandera Inklusiboa jarriko du udaletxeko balkoian.
Keinu horren bidez, Udalak LGTBIQ+ komunitatearekiko bere babesa, aitorpena eta konpromisoa helarazi nahi ditu, eta gogorarazi nahi du garrantzitsua dela pertsona guztien eskubideak defendatzen jarraitzea edozein diskriminazio-motaren aurrean. Egun horretan bertan, 18:00etatik 21:00etara, Photocall Ibiltaria egingo da Laudioko kaleetan zehar. Jarduerak ibilbide bisuala proposatzen du, udalerria osatzen dutenen aniztasuna eta aberastasuna ospatzeko.
Ekimenean zehar argazki analogikoak egingo dira eta nahi duten pertsonek Udalaren LED pantaila informatiboetan ere agertu ahal izango dira, Laudioko aniztasuna ikusaraziko duen mosaiko kolektibo baten parte izanik.
Bestalde, larunbatean, ekainak 27, Aldai Plazak Beldur Barik Gunea hartuko du, 22:00etatik 02:00etara. Gune horrek informazioa, babesa eta sentsibilizazioa eskainiko ditu, jai seguruak eta indarkeria matxista, sexista eta LGTBIQ+fobikorik gabekoak sustatzeko. Helburua da egon daitezkeen diskriminazio-egoerei erantzutea eta errespetuan, berdintasunean eta askatasunean oinarritutako ingurunea sustatzea.
Laudioko Udalak herritarrak gonbidatzen ditu Laudio Harro 2026 ekimenean parte hartzera eta espazio publikoan harrotasuna, elkarbizitza eta aniztasuna aldarrikatzen dituen programazioarekin bat egitera. Era berean, pertsona guztiak askatasunez, duintasunez eta beldurrik gabe bizi ahal izateko lanean jarraitzeko konpromisoa berretsi du Udalak.