Laudioko Udalak herritarrak animatu nahi ditu Activa Bizkaia Erronkaren IV. edizioan parte hartzera. Zahartze aktiboa, jarduera fisikoa eta bizimodu osasungarriak sustatzen dituen ekimena irailaren 18an, ostirala, izango da Bilbon, eta 55 urtetik gorako laudioarrek udalerria ordezkatzeko aukera izango dute.
Erronkaren helburua da parte-hartzaile guztien artean 12 orduz etenik gabe jarduera fisikoa egitea, erreleboen bidez. Horretarako, bakoitzak bere gaitasun eta erritmoaren arabera hartu ahal izango du parte, oinez edo korrika.
Parte-hartzaileek ordubeteko txandak erreserbatu ahal izango dituzte oinez ibiltzeko, eta 30 minutuko txandak korrika egiteko, betiere norberaren erritmora egokituta.
Ekitaldia Bilboko Udalak eta SECOT Adineko Boluntarioen Elkarteak antolatzen dute, eta Bilboko erdigunean egingo da, Arenal zubiaren inguruko ibilbide irisgarri batean, goizeko 08:00etatik 20:00etara.
Izen-ematea zabalik
Erronkan parte hartzeko interesa duten herritarrek dagoeneko eman dezakete izena honako webgune honetan:
https://activabizkaia.com/
Parte-hartzea doakoa izango da, eta Laudioko ordezkariek udalerriaren izena daraman kamiseta pertsonalizatua jantziko dute ekitaldian.
Materialaren banaketa
Parte-hartzaileek kamisetak eta gainerako materiala Laudioko Udaletxean jaso ahal izango dute:
• Irailaren 14an
• Irailaren 15ean
• Irailaren 16an
Informazio gehiago behar dutenek antolakuntzarekin harremanetan jar daitezke:
638 547 927
Laudioko Udalak 55 urtetik gorako herritar guztiak gonbidatu nahi ditu ekimen honetan parte hartzera, jarduera fisikoa sustatzeko, harreman sozialak indartzeko eta zahartze aktiboaren aldeko konpromisoa erakusteko.