Laudioko Udalak beste urte batez berretsi du jai seguru, berdinzale eta indarkeria matxistarik, sexistarik edo LGTBIQ+fobikorik gabekoen aldeko konpromisoa. Helburua argia da: pertsona guztiek Sanrokeak askatasunez, errespetuz eta beldurrik gabe gozatu ahal izatea.
Horretarako, jaietan zehar Beldur Barik gunea egongo da martxan, erasoen prebentziorako, sentsibilizaziorako eta arreta emateko erreferentziazko espazio gisa.
Informazioa, babesa eta laguntza
Beldur Barik gunea Batzalarrin kalean kokatuko da, eta gaueko ordutegian txosnagunean (Aldai plaza) izango da.
Bertan, generoan eta sexualitatean espezializatutako profesionalek arreta integrala, konfidentziala eta doakoa eskainiko dute. Herritarrek aukera izango dute:
- Informazioa eta aholkularitza jasotzeko.
- Eraso sexisten edo LGTBIQ+fobikoen aurrean laguntza eskatzeko.
- Errespetuan, berdintasunean eta erantzukidetasun kolektiboan oinarritutako
jai eredua sustatzeko.
Arreta ordutegiak
- Abuztuaren 15ean: 12:00-15:00 eta 19:00-02:00
- Abuztuaren 16an eta 17an: 22:00-03:00
- Abuztuaren 27an, 28an eta 29an: 22:00-04:00
Ikusgune ere izango da jaietan
Aurten ere Ikusguneren karpa izango da Sanrokeetan. Araban homofobia, lesbofobia, bifobia eta transfobiaren aurkako behaketa-sistema den Ikusgunek informazioa, sentsibilizazioa eta orientazioa eskainiko ditu.
Karpa abuztuaren 28an egongo da Batzalarrin kalean, 19:00etatik 22:00etara.
24 orduko arreta telefonoak
Udalak gogorarazi nahi du arreta eta laguntza jasotzeko baliabide espezializatuak eskuragarri daudela urteko egun guztietan eta eguneko 24 orduetan:
- SATEVI (900 840 111): Eusko Jaurlaritzaren zerbitzu espezializatua indarkeria matxistaren biktima diren emakumeentzat.
- Tximeletak Zentroa (650 801 080): 16 urtetik gorako sexu indarkeriaren biktimei arreta integrala eskaintzen dien zentroa.
- Larrialdiak: 112