Klima eta Energia Planaren helburua Laudioko egungo egoeraren diagnostiko integrala egitea izango da, besteak beste, energia-kontsumoak, berotegiefektuko gasen emisioak, klima-arriskuak eta udalerriaren zaurgarritasuna aztertuz. Horrez gain, aurretik garatutako udal-plangintza ere kontuan hartuko da, hala nola 2024-2030 Udal Energia Plana eta Mugikortasun Plana.
Diagnostiko horretatik abiatuta, epe labur, ertain eta luzerako ekintzak zehaztuko dira, klima-aldaketa arintzeko, haren ondorioetara egokitzeko eta energia-eraginkortasuna hobetzeko. Ekintza Planak jarraipen eta ebaluazio mekanismoak ere jasoko ditu, aurrerapena urtez urte aztertu ahal izateko. Prozesuak herritarren eta tokiko eragileen parte-hartzea izango du ardatz.
Udaleko ordezkari politiko eta teknikoekin batera, auzoetako ordezkariek, Toki Kontseiluak, herritarrek eta tokiko gizarte, ekonomia eta hezkuntza eragileek beren ekarpenak egiteko aukera izango dute.
Bestalde, Babesleku Klimatikoen Udal Sarearen bidez, bero-boladak eta muturreko tenperaturak bezalako egoeren aurrean herritarrak babesteko espazio
egokiak identifikatuko dira. Horretarako, barneko eta kanpoko espazio publiko zein pribatuak aztertuko dira, hala nola parkeak, plazak, kirol- eta kultura-guneak edo beste erabilera komunitarioko espazio batzuk.
Sareak babeslekuen arteko ibilbide klimatikoak ere identifikatuko ditu, eta babesguneen mapa georreferentziatua eta herritarrentzako informazio eta erabilera-protokoloak prestatuko dira. Era berean, bero-boladen aurrean jarduteko udal-protokolo bat landuko da, herritarrei aholku praktikoak eta babeslekuen kokapena helarazteko.
Bi ekimenek elkar osatuko dute: Klima eta Energia Planak Laudioko klimaeta energia-politiken epe luzerako estrategia zehaztuko du, eta Babesleku Klimatikoen Udal Sareak muturreko tenperaturen aurrean udalerriaren egokitzeko gaitasuna eta herritarren babesa indartuko ditu.