Izen baten bila hasi zen bidea, 146 proposamen jaso zituen lehen geltokian, hiru aukera iritsi ziren azken txanpara eta, azkenik, 692 herritarrek eman dute azken hitza.
Laudioko arte eszenatoki berriak Laudio Antzokia izena izango du.
Irailaren 29tik urriaren 5era egindako herri-bozketan hiru aukera izan dituzte mahai gainean Laudion erroldatutako herritarrek: Laudio Antzokia, Larra Antzokia eta Taupada. Parte-hartzea handia izan da: guztira 692 boto baliodun jaso dira, boto zuririk gabe.
* Laudio Antzokia: 489 boto (%70,66)
* Larra Antzokia: 113 boto (%16,33)
* Taupada: 90 boto (%13,01)
Ainize Gastaka alkateak herritarren parte-hartzea nabarmendu du: “Antzoki berriari izena jartzea baino zerbait gehiago izan da prozesu hau. Hasieratik nahi genuen herritarrek espazio berri hau bere egitea, eta izena elkarrekin aukeratzea horretarako lehen urratsetako bat izan da. 146 proposamen jaso genituen
lehenengo, eta ia 700 lagunek hartu dute parte azken erabakian. Horrek erakusten du antzoki berriak interesa eta ilusioa piztu dituela herrian”.
Bestetik, Laudioko Udalak eskerrak eman nahi dizkie bide honetan parte hartu duten guztiei: lehen fasean euren ideiak partekatu zituztenei, proposamenak
lantzen parte hartu dutenei eta azken bozketan euren aukera egin duten 692 herritarrei. Parte-hartze prozesua amaitu bada ere, antzokiaren ibilbide berria hasi besterik ez da egin.
Hemendik aurrera, Laudioko kulturaren eta arte eszenikoen etxe berriak badu izena: Laudio Antzokia.