Datozen auzo-batzarren harira, Laudioko Udalak udalerriko auzoetan eta landaeremuan egingo diren hamar ibilaldi irekien egutegiaren berri eman du. Ibilaldiak urriaren 19tik azaroaren 3ra bitartean egingo dira.
Ibilbideak auzo-kontseiluekin aurrez egindako bileretan adostu dira, eta topaketa horietan landutako gaiei jarraipena emateko balioko dute. Horrela, aurretik identifikatutako egoerak bertatik bertara aztertu eta bizilagunen ekarpen berriak jasoko dira.
Ibilaldiak herritar guztiei irekita egongo dira, eta Udaleko hainbat arlotako teknikariek ere parte hartuko dute. Helburua auzotarren oharrak jasotzea da, espazio publikoen egoerari eta erabilerari, eguneroko beharrei nahiz eremu bakoitzean egin daitezkeen hobekuntzei buruz.
Ibilaldietan hainbat gai landu ahal izango dira, besteak beste, mugikortasuna, irisgarritasuna, topaguneak, elkarbizitza, natura-ingurunea, eremuen arteko loturak eta gaur egun gutxi erabiltzen diren espazioen erabilera.
Aurrez aurre nahiz online parte hartzea
Parte hartu nahi duten herritarrak dagokien elkargunera joan ahal izango dira, zehaztutako egun eta orduetan.
Era berean, ibilaldietan aurrez aurre parte hartu ezin dutenek udalaren webgunearen bidez egin ahal izango dituzte ekarpenak. Horretarako, urriaren 19tik aurrera, ibilaldi bakoitzaren ibilbidea eta galdetegi orokor bat izango dituzte eskuragarri, beren iradokizunak eta oharrak helarazteko.
