Fernando Aire «Xalbador» (Urepele, 1920-1976) bertsolariaren heriotzaren 50. urteurrena beteko da azaroaren 7an. Urepeleko artzain eta bertsolariaren oroimena gogora ekartzeko, Laudiok hainbat kultur jarduera antolatu ditu azaroaren 6rako eta 7rako, musika eta bertsolaritza ardatz hartuta.
Egitarauak Xalbadorren ondarea ezagutzeko aukera emango du, euskal kantagintzaren bidez haren oroimena biziberritzeko eta bertsolaritzaren bilakaeran sakontzeko.
Azaroak 6, ostirala
18:30ean, Kasinoan: «Xalbadorrenetik kantamintza» Unai Ormaetxeak gidatutako saio didaktiko eta parte-hartzaile honen bidez, euskal musikaren eta bertsolaritzaren historian barrena ibilbidea egingo dute bertaratzen direnek.
Azaroak 7, larunbata
12:30ean, Aldai plazan: Laudioko abesbatzen emanaldia Laudioko bost abesbatzek goizeko emanaldian parte hartuko dute. Talde bakoitzak bere aukerako abesti bat eskainiko du, eta, ondoren, guztiek batera «Xalbadorren heriotzean» abestuko dute. Horrela, abesti ezagunaren bost bertsio entzuteko aukera izango dute herritarrek, baita abesbatza bakoitzak hautatutako kantuak ere.
Hurrengo abesbatzek girotuko dute herria abesti-aukeraketa honekin:
• Andere: «Azken dantza hau»
• Arte On: «Goizian argi hastian»
• Bi Hotsak: «Axuri beltza»
• Los Arlotes: «Ikusi mendizaleak»
• Santa Lucía: «Txanton Piperri»
«Xalbadorren heriotzean» euskal kantagintzako abesti esanguratsuenetako bat da. Xabier Lete musikari eta konpositoreak sortu zuen 1978an, Xalbador hil eta bi urtera, haren adiskidearen heriotzak eragindako saminetik abiatuta. Urteekin, euskal kulturaren erreferentziazko kantu bihurtu da; 2005ean, gainera, Euskal Kanturik Onena telebista-lehiaketan garaile aukeratu zuten.
18:30ean, Kasinoan: «Bat-bateko mirakulua», Xabier Amurizarekin Xabier Amuriza bertsolariak «Bat-bateko mirakulua» izeneko hitzaldi-ikuskizuna eta bertso-saioa eskainiko ditu, Xalbadorren inguruan.
Amuriza XX. mendearen amaierako bertsolaritza modernoaren berritzaile nagusietako bat izan zen. Bertsolaritzaren oinarriak berritu zituen, tradiziozko plaza-jarduna kultura-adierazpide modernoago eta zabalago bihurtuz. Horrez gain, bertsolaritza ikasi eta landu daitekeen jarduera gisa ulertzeko ikuspegia indartu zuen, Euskal Herrian bertso-eskolen hedapenean eragin handia izanik.